Almaty oblysynda bir kúnde mal urlyǵynyń 9 deregi ashyldy
TALDYQORǴAN.QazAqparat - Almaty oblysy aýmaǵynda júrgizilgen «Mal urlyǵy» jedel aldyn alý is-sharasy barysynda bir kúnde mal urlyǵyna qatysty 9 derek ashylyp, qylmysqa qatysy bar kúdiktiler anyqtaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, ózgeniń malyn urlaý faktileri Aqsý, Jambyl, Kóksý, Panfılov, Jambyl, Kerbulaq, Eskeldi jáne Balqash aýdandary jáne Taldyqorǵan qalasynda ashylǵan. Máselen, Aqsý aýdanynyń eki turǵyny jaıylymdaǵy jylqylaryn joǵaltyp, ózderi taba almaǵan. Іzdeý jumystary nátıje bermegendikten olar maldarynyń joǵalǵandyǵy jóninde polıtsııaǵa aryz bergen.
«Osy qylmystardy ashýǵa baǵyttalǵan jedel izdestirý sharalary barysynda sol kúni oblys ortalyǵyna jaqyn ornalasqan aýdannyń bir turǵyny qylmysqa qatysy bolýy múmkin degen kúdikke ilindi. Aldyn-ala tergeý barysynda kúdiktiniń aýdanda jasalǵan mal urlyǵynyń eki faktisine qatysy bary dáleldendi»,- dep habarlaıdy Aqsý aýdany Polıtsııa bólimi bastyǵynyń orynbasary, polıtsııa maıory Aıdar Amangeldıev.
Vedomstvo ókilderi taratqan aqparatqa sáıkes, bul faktilerdiń barlyǵy boıynsha QR Qylmystyq kodeksiniń 188-babyna sáıkes sotqa deıingi tergeý amaldary júrgizilýde. Anyqtalǵan kúdiktilerdiń osyǵan uqsas basqa da qylmystarǵa qatystylyǵy anyqtalýda. Sondaı-aq, urlanǵan maldy izdep tabý nemese olardy satyp alýmen aınalysatyn tulǵalardy anyqtaý boıynsha jumys júrgizilýde.
«Mal urlyǵy» jedel aldyn alý is-sharasy 4-6 aqpan aralyǵynda ótedi. Іs-sharanyń negizgi maqsaty - oblystaǵy mal urlyǵynyń aldyn alýǵa jáne ony boldyrmaýǵa baǵyttalǵan. Jyl basynan beri tártip saqshylary ózgeniń malyn urlaýdyń 54 deregine qatysy bar tulǵalardy anyqtaǵan. Onyń ishinde qylmystyń izin sýytpaı ashýmen qatar, buryn jasalǵan qylmystar da ashylyp otyr», - dep tolyqtyrdy polıtsııa departamentindegi baspasóz qyzmeti.
