Almaty oblysynda bir kúnde mal urlaǵan 28 kúdikti ustaldy

TALDYQORǴAN. QazAqparat - Almaty oblysynyń tártip saqshylary «Mal urlyǵy» jedel aldyn alý is-sharasynyń alǵashqy kúni mal urlyǵynyń 18 deregin áshkerelep, qylmysqa qatysy bar 28 kúdiktini anyqtady. 60 bas mal óz ıelerine qaıtaryldy. Onyń ishinde 45 qoı, 14 sıyr jáne jylqy bar, dep habarlaıdy QazAqparat tilshisi.

Almaty oblystyq Polıtsııa departamentiniń baspasóz qyzmeti taratqan aqparatqa sáıkes, Qapshaǵaı qalasynyń polıtsııasyna jergilikti sharýa qojalyqtardyń birinen 40 qoıdyń qoldy bolǵany týraly habarlama túsken. Tártip saqshylary jedel izdestirý sharalary barysynda kórshi qystaqta mal baǵatyn 30 jastaǵy azamat qylmysqa qatysy bar degen kúdikke ilingen. Sotqa deıingi tergeý barysynda onyń kórshisiniń 40 qoıyn jaıylymnan urlap, olardy Talǵar aýdanyna jetkizgeni anyqtaldy. Polıtseıler urlanǵan 33 bas qoıdy ıesine qaıtardy.

«Zardap shegýshige 1,5 mıllıon teńge shyǵyn kelgen. Kúdikti azamattyń buǵan deıin mal urlaǵany úshin bas bostandyǵy shektelgeni jáne ol merzimniń aıaqtalmaǵany belgili boldy. Qazirgi ýaqytta ol Qapshaǵaı qalasy polıtsııasynyń ýaqytsha ustaý ızolıatoryna qamaqqa alyndy. Onyń budan ózge qylmystarǵa qatysy bar-joǵy anyqtalýda»,- dep tolyqtyrdy Almaty oblystyq polıtsııa departamentiniń baspasóz qyzmetinen.

Bıyl Almaty oblysynda mal urlyǵyna qatysy bar degen aıyp taǵylǵan qylmystyq toptyń 59 múshesi jaýapkershilikke tartylǵan. Olardyń 181 mal urlyǵyn jasaǵany dáleldengen. Zardap shegýshilerge 80 mıllıon teńgege jýyq materıaldyq shyǵyn óndirilgen.