Almaty oblysynda bir kúnde 5 bala sýǵa ketti
TALDYQORǴAN.QazAqparat - Almaty oblysynda bir kúnde 5 bala sýǵa ketip, ajal qushty. Qaıǵyly jaǵdaı 8 mamyrda bolǵan, dep habarlaıdy QazAqparat tilshisi.
Qara jamylǵan januıanyń biri Raıymbek aýdanynyń turǵyndary. Bir otbasy bir kúnde 3 birdeı balasynan aıyrylyp qaldy. 2012, 2014 jáne 2015 jylǵy balalar Talas aýyly mańyndaǵy qystaq aýmaǵynda oınap júrgen. Balalar sý qubyry janynan qazylǵan shuńqyrdaǵy sýǵa qulap ketken. Qaıǵyly jaǵdaı balalardyń úıinen 300 metrdeı jerde oryn alǵan. Anasy bul sátte úıinde bolǵan. Al ákesi sharýalarymen shyǵyp ketken eken.
Al taǵy bir oqıǵa Eskeldi aýdanynyń Terekti aýyly mańynda tirkeldi. Ol jerde eki qyz tilsiz jaýdyń qurbany boldy. Kýágerlerdiń aıtýynsha, qyzdar sańyraýqulaq terýge ketip, úılerine oralmaǵan. Anyqtalǵandaı, aýyl turǵyny óziniń eki qyzy jáne kórshiniń bir qyzyn alyp, sańyraýqulaq terýge shyqqan. Biraq kelinshek óziniń kishkentaı qyzyn alyp, úıine qaıtyp ketken. Keshke qaraı, kórshiniń qyzymen qalǵan balasynyń úıge oralmaǵanynan keıin izdeýge kirisken. Іzim-qaıym joǵalǵandardy 100-den astam adam izdedi. Ókinishke oraı, 11 jáne 13 jastaǵy balalardyń denesi kelesi kúni, ıaǵnı 9 mamyrda Terekti ózeninen tabyldy.
Almaty oblystyq TJD ókilderi balalardy ata-ananyń baqylaýynsyz qaldyrmaýdy suraıdy. Sebebi, atalǵan qaıǵyly oqıǵalar jasóspirimderdiń abaısyzdyǵynan oryn alyp otyr. Eger osy sátte balalardyń janynda úlkender bolsa, bálkim mundaı qaıǵyly jaǵdaılar oryn almas edi, deıdi tótenshelikter.
