Almaty oblysynda bir kúnde 40-tan astam qarý tárkilendi
TALDYQORǴAN. QazAqparat - Almaty oblysynyń bes aýdanynda bir táýlik ishinde qarý saqtaǵan 40-tan astam azamat jaýapkershilikke tartyldy, dep habarlaıdy QazAqparat tilshisi.
Eske sala keteıik, Almaty qalasynda ótetin 28-i qysqy Ýnıversıada oıyndaryna baılanysty óńirde «Quqyqtyq tártip» sharasy bastalǵan bolatyn. Polıtsııa qyzmetkerleri belsene júrgizip jatqan bul sharanyń bir baǵyty qarý aınalymyna qatysty baqylaýdy kúsheıtý bolyp otyr.
Toqtala ketetin jaıt, «Quqyqtyq tártip» sharasy aldyn alý sıpatyna ıe. Ol boıynsha Almaty qalasyna jaqyn ornalasqan oblystyń Talǵar, Qarasaı, Іle, Jambyl jáne Eńbekshiqazaq aýdandaryn qamtyǵan sharaǵa myńǵa jýyq qyzmetker tartylǵan. Polıtsııa birqatar baǵytta, atap aıtqanda kóshi-qon, esirtki bıznesimen kúres, sondaı-aq lıtsenzııalyq-ruqsattama boıynsha reıdter ótkizedi.
«Birinshi kúngi shara nátıjesinde aınalymnan 49 atys qarýy alyndy, onyń ekeýi zańsyz. Buzýshylyqqa jol bergen 42 qarý ıesi jaýapkershilikke tartylyp, olarǵa qatysty 453 800 teńge soma aıyppul salyndy. Budan bólek, kóshi-qon zańnamasyn buzǵan 70 sheteldik azamat pen 77 qazaqstandyq jaýapkershilikke tartyldy», - delingen baspasóz baıanynda.
Shara aıasynda polıtsııa qyzmetkerleri Qarasaı jáne Talǵar aýdanynda qylmys jasaǵany úshin izdeýde júrgen eki kúdikti ustalǵan. Іle jáne Qarasaı aýdandarynda iz-tússiz joǵalǵan eki adam tabyldy.
