Almaty oblysynda bir ǵana jylyjaıdan 40 myń tonna qııar men qyzanaq alynbaq

TALDYQORǴAN. QazAqparat - Almaty oblysynda qııar men qyzanaq kóptep ósirilmek. Osy maqsatta Qapshaǵaı qalasyndaǵy «Green land Alatau» jylyjaıy ınvestorlardy tartpaq. Búgin jobanyń mán-jaıyn Premer-Mınıstrdiń birinshi orynbasary Asqar Mamınge tanystyrdy,- dep habarlaıdy QazAqparat tilshisi.

Qazirgi tańda jylyjaıdyń jalpy aýmaǵy 10 ga jerdi quraıdy. Atalǵan jobany «QazAgro» arqyly júzege asyrý múmkin bolǵan. Endi ınvestorlardy tartý arqyly tabıǵı taza ónim kólemi eselep artpaq. «Green land Alatau» jylyjaıynyń bólim basshysy Eskendir Muhamedjanovtyń aıtýynsha, alqap kólemi 60 ga deıin jetkizilmek.

«Mundaı alyp jobany júzege asyrýǵa ındýstrııalyq aımaqtyń úlesi zor. Bizge barlyq jaǵdaı jasalǵan. Ózderińiz bilesizder, jylyjaı salý óte mashaqaty kóp sharýa. Jergilikti bıliktiń qoldaýynyń nátıjesinde jumysymyzdy jandandyryp jatyrmyz», - deıdi «Green land Alatau» jylyjaıynyń bólim basshysy Eskendir Muhamedjanov.

Endi 6 myń tonna ónimdi 40 myń tonnaǵa deıin ulǵaıtý josparlanýda. Atalǵan joba Almaty oblysyndaǵy «Bereke» ındýstrııalyq aımaǵynda júzege asýda. Investıtsııanyń jalpy quny 66 mlrd teńgeden astam qarjyny quraıdy.

Aıta ketelik, qazirgi tańda Almaty oblysynda ındýstrııalyq aımaqta túrli jobalar júzege asýda. Aldaǵy ýaqytta et óńdeıtin kásiporyn iske qosylmaq. Basym bóligi qoı etine baǵyttalmaq. Búginde oblys boıynsha 4 mlnnan astam qoı bar. Alaıda, ony zaman talabyna saı óndeıtin kásiporyn joq. Endi Germanııanyń «Baumann» kompanııasy máseleni qolǵa alamyz dep otyr. Atalǵan kásiporyn 1937 jyldan beri naryqta qoı etin óńdeýmen aınalysyp keledi. Joba oıdaǵydaı júzege assa eksport kólemi artady.