Almaty oblysynda bir bólmeli páterde turǵan soǵys ardagerine jer úı berildi
TALDYQORǴAN. QazAqparat - Búgin Almaty oblysy Aqsý aýdanyndaǵy Jansúgirov aýylynyń turǵyny, Ekinshi dúnıejúzilik soǵystyń ardageri Ermuhan Rysbekovke jańa jer úıdiń kilti tabystaldy. Aýdan ákimdigi qonys ıesiniń úıine birden kómir men aǵash otynyn da túsirip berdi, dep habarlaıdy QazAqparat tilshisi.
Aıta keteıik, soǵys ardageri Ermuhan Rysbekovke 2013 jyly ákimdik tarapynan bir bólmeli páter berilgen bolatyn. Bul shańyraqta barlyǵy 5 adam turyp keldi. As úıdi jatyn bólme, kire beris dálizdi as úı qylǵan otbasy páterdiń tarshylyǵyn ábden tartqan bolatyn. Ardagerge 2016 jyldan beri úsh balasy bar Danagúl esimdi nemeresi qarap keledi.
«Biz óz tarapymyzdan ardagerdiń ótinishin qarap, búgin 3 bólmeli jer úıdiń kiltin tabystadyq. Jańa shańyraqtyń jalpy aýmaǵy 66 sharshy metr. Qonys ıesi Ermuhan atamyz jańa úıge kóshýine baılanysty qysqa daıyn emestigin eskerip, qatty otynmen jáne aǵashpen kamtamasyz ettik», - dedi Aqsý aýdanynyń ákimi Esim Bazarhanov.
