Almaty oblysynda bir aıǵa jýyq habar-osharsyz ketken otbasy tabyldy
TALDYQORǴAN. QazAqparat - Almaty oblysynda bir aıǵa jýyq ýaqyt habar-osharsyz ketken jas otbasyny óńir polıtseıleri izdep tapty, dep habarlaıdy QazAqparat tilshisi.
Erli-zaıyptylar Kóksý aýdanyndaǵy ata-anasyna qonaqqa baryp, Semeı qalasyna qaıta shyqqan baǵytta joǵalyp ketken.
Jas otbasy jańa jyldy ata-anasymen birge qarsy alýǵa Kóksý aýdanyna qonaqqa kelip, 6 qańtar qaıta jolǵa shyqqan. Baılanysqa shyqpaǵannan keıin ata-anasy Kóksý aýdandyq polıtsııa bólimine aryz túsiredi. Otbasy 20 kúnnen astam ýaqyt respýblıkalyq izdeýde bolǵan.
«Joǵalǵandardyń sýreti men belgileri barlyq polıtsııa qurylymdaryna taratyldy. Nátıjesinde Kóksý aýdanynyń polıtseıleri oblystyq departament qyzmetkerleri kómegimen erli-zaıyptylardy Aqsý aýdanynan tapqan. Osy ýaqytqa deıin jastar sol aýdandaǵy qystaqtardyń birinde tanystarynyń úıinde qonaqta bolǵan. Olar jumysqa ornalasyp, sonda qalýdy josparlǵan»,- dep málimdeıdi Almaty oblystyq polıtsııa departamentiniń baspasóz qyzmeti.
23 jastaǵy azamat men onyń 20 jastaǵy zaıyby týystaryna aman-esen tapsyryldy.
