Almaty oblysynda bir aıda 94 balanyń aǵzasynan bógde zattar alyndy
TALDYQORǴAN. QazAqparat - Bıyl qańtar aıynda Almaty oblystyq balalar klınıkalyq aýrýhanasynyń dárigerleri bógde zattardy jutyp qoıǵan 94 balany qutqaryp qalǵan, dep habarlaıdy QazAqparat tilshisi.
Mamandar balalardyń tynys alý joldary, óńeshte, murynda, asqazanda, qulaqta jáne ishekte turyp qalǵan bógde zattardy alǵan. Jas shamasy 6 aıdan 5 jasqa deıingi balalardyń aǵzasynan monetalar, saǵat batareıalary (hımııalyq kúıik beredi), shegeler, túıreýishter, kıimniń salpynshaqtary, piste qabyǵy, jańǵaq, qalam qalpaǵy tabylsa, qulaq pen murynnan usaq monshaqtar, qaǵaz, porolon, tastar alynǵan.
Dárigerlerdiń aıtýynsha, ata-analar bógde zat balalardyń aǵzasyna túskennen keıin 2-10 kún aralyǵynda ǵana dáriger kómegine júgingen. Aǵzadaǵy keıbir bógde zattar rentgen zertteýi nemese ÝDZ jasaǵan kezde tabylǵan. Atalǵan klınıkaǵa 2020 jyldyń ekinshi jartyjyldyǵynda ártúrli satydaǵy bógde zattar aǵzasyna túsken 21 bala jetkizilgen.
Sonymen qatar balalar arasynda hımııalyq suıyqtyqty iship (turmystyq tazalaý quraldaryn), aýyz jutqynshaǵy men óńeshi kúıik alǵandar da bar. 2020 jyldyń ekinshi jartyjyldyǵynda «óńesh túınegi» dıagnozymen 22 bala em qabyldaǵan. Dárigerlerdiń aıtýynsha, ishki aǵzasyn hımııalyq kúıik shalǵan balalar múgedek bolyp, múmkindigi shekteýli balalar qataryna qosylǵan.
Dárigerler bul jaǵdaı ata-analardyń balalarǵa salǵyrt qaraýynyń sebebinen oryn alyp otyrǵanyn aıtady. Biraq ata-analar ózderin kináli sanamaıdy. Onyń ornyna dárigerlerge dórekilik tanytý jıi kezdesetini aıtylýda. Sondyqtan mamandar ata-analardy bala ómirine jaýapkershilikpen qaraýǵa shaqyrady.
