Almaty oblysynda bir aı izdestirilgen jasóspirim tabyldy
TALDYQORǴAN. QazAqparat - Almaty oblysyndaǵy Talǵar aýdanynyń polıtseıleri shilde aıynyń sońynda belgisiz baǵytta ketken 16 jastaǵy jasóspirimniń ornalasqan mekenjaıyn anyqtady, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, balanyń anasy ulyn ózi izdep tabýǵa tyrysqan, onyń ózdigimen qaıtyp oralatynyna da úmittengen.
Anasynyń ótinishi negizinde uıymdastyrylǵan izdeý sharalary barysynda jasóspirim tabylyp, anasyna tabystaldy.
«Joǵalǵan bala osy ýaqytqa deıin dosynyń úıinde bolǵan. Jasóspirim buǵan deıin de úıinen ketip júrgen. Ol bizdiń arnaıy esepte turǵan bolatyn. Qatesin moıyndap, túzelmegenine baılanysty ony taǵy da esepke qoıyp, baqylaýǵa alý máselesin kóterip otyrmyz. Jasóspirimmen túsindirý jumystary júrgizildi»,- dedi Talǵar APB basshysy Erlan Qasym.
Tabylǵan balanyń jaqyndarymen de tıisti jumystar júrgizilip, jasóspirim taǵy úıden ketse, polıtsııaǵa jedel habar berýdiń tıimdi ári izdeý jumystarynyń nátıjeli bolatynyn eskertti.
