Almaty oblysynda bir aı buryn joǵalǵan balany izdeý jalǵasady - ІІD
TALDYQORǴAN. QazAqparat - Almaty oblysynyń Úshtóbe qalasynda joǵalǵan Isa Bekbaevty izdeý jumystary toqtamaıdy. Bul jóninde oblystyq ІІD baspasóz qyzmeti málim etti, dep habarlaıdy QazAqparat tilshisi.
Esterińizge sala keteıik, 29 maýsym kúni joǵalǵan 13 jastaǵy balany oblys qutqarýshylary 16 kún boıy izdep, jumystary nátıje bermegen bolatyn. Sol sebepti balany izdeý toqtatylǵany jóninde onyń ata-anasyna resmı hat arqyly habarlanǵan. Biraq balasy Qaratal ózenine aǵyp ketti degenge senbegen ata-ana oblystyq ІІD-ne arnaıy baryp, basshylyǵynan izdeýdi keshendi túrde júrgizýdi surady. Tártip saqshylary izdeý jumystary qaıta jandanady dep sendirdi.
«Balanyń denesi tabylǵansha izdeý jumystary jalǵasatyn boldy. Polıtsııa qyzmetkerleri qutqarýshylarmen birigip, jumys atqarady», - dedi Almaty oblystyq ІІD Baspasóz qyzmetiniń jetekshisi Sergeı Neznaev.
Aıta keteıik, Isa Bekbaevtyń joǵalǵany týraly aqparatty ǵalamtor jelisiniń paıdalanýshylary jarııalaǵan edi. Aldyn ala jasalǵan boljam boıynsha, bala Qaratal ózenine batyp ketken. Búgin ǵana balany izdeý jumystary toqtatylatyny týraly habar taraǵan bolatyn.
