Almaty oblysynda bilim, medıtsına jáne jer bólý salasynda jemqorlyq jıi kezdesedi

QONAEV. QazAqparat - Búgin Almaty oblysy boıynsha Sybaılas jemqorlyqqa qarsy qyzmet departamentiniń bastamasymen sybaılas jemqorlyqqa beıim salalardyń kartasy tanystyryldy, dep habarlaıdy QazAqparat tilshisi.

Jemqorlyq kartasynda óńirdiń áleýmettik turaqtylyǵyna áser etetin, sondaı-aq memlekettik organdardyń atyna halyq tarapynan qoǵamdyq rezonans pen syn kóp túsetin 3 baǵyt aıqyndalǵan.

Olardyń arasynda densaýlyq saqtaý, bilim jáne jer qatynastary bar.

Sybaılas jemqorlyqqa qarsy qyzmet departamenti basshysynyń birinshi orynbasary Nursultan Bekinovtyń aıtýynsha, problemalyq máselelerdi sheshý úshin osy baǵytqa monıtorıng júrgizý bastaldy.

Mysaly, jer qatynastary salasyndaǵy aldyn ala derekter boıynsha Almaty oblysynyń aýyl sharýashylyǵy jerleriniń nysanaly maqsatyna zańsyz ózgeris jáne olardy segmentteý belgilendi.

Densaýlyq saqtaý júıesi boıynsha memlekettik-jekemenshik áriptestik jobalary sheńberinde medıtsına mekemeleriniń shart mindettemelerin oryndamaýy baıqalady.

Bul medıtsına qyzmetteri sapasynyń tómendeýine ákeledi.

Bilim berý salasynda tıisti baqylaýdyń bolmaýyna baılanysty mektepterdegi alymdarǵa shaǵymdar jıilep ketti.

J yl basynan beri agenttiktiń Call-ortalyǵyna Almaty oblysy boıynsha osyndaı 40-qa jýyq ótinish kelip túsken.

Esterińizge sala keteıik, Almaty oblysy boıynsha sybaılas jemqorlyqqa qarsy qyzmet departamenti bıyl 9 aıynda 99 sybaılas jemqorlyq faktisin tirkedi.

65 adam jaýapkershilikke tartyldy, onyń ishinde 13 túrli dárejeli basshylar bar.