Almaty oblysynda beıit basyndaǵy qulpytas urlandy
TALDYQORǴAN. QazAqparat – Almaty oblysynda beıit basyndaǵy qulpytas urlandy. Oqıǵa Kóksý aýdanyndaǵy Muqyry aýylynda bolǵan, dep habarlaıdy QazAqparat tilshisi.
Sholpan Sadyqovanyń aıtýynsha, ol 14 shilde kúni joldasynyń basyna quran oqytýǵa kelgen. Sol kezde marqum kúıeýine qoıylǵan granıt tastyń urlanǵanyn kórip, shoshyp ketken.
«Sońǵy ret 30 sáýirde kelgende barlyǵy bútin bolǵan. Endi kelsem tas joq. Bir basynda qara tas. Kelgende áıteýir bet sıpap, quran oqyp qana qaıtamyz. Endi dalaǵa kelgendeımiz. Ne aty, ne zaty joq. Elder temirin alyp ótkizedi deıtin, jaraıdy, ol adamnyń mıyna sııatyn. Endi marqumnyń aty jazylǵan tasty qalaısha urlap ketedi? Qalaı basqa adamǵa satady? Adamdar ne bolyp barady, túsinbeımin. Joldasym qaıtys bolyp, tórt balammen qaldym. Balalarym ákelerine ornatylǵan tastyń joǵalǵanyn kórip, jylady», - deıdi Kóksý aýdanynyń turǵyny Sholpan Sadyqova.
Urlanǵan qara granıt tastyń quny qazir naryqta 150 myń teńgeniń kóleminde eken. Jerleý rásimimen aınalysatyndardyń aıtýynsha, tasqa jazylǵan esimdi op-ońaı óshirýge bolady. Sumdyq jaıttan eseńgirep qalǵan Sadyqovtar áýleti jergilikti ákimdik zırat basyna bir adamdy bekitip, kúzetshi etip qoısa deıdi. Sebebi, beıit basyndaǵy tasty syndyryp, urlap ketken urydan kez kelgen sumdyqty kútýge bolady dep úreılenip otyr. Oqıǵa bolǵan eldi mekendegi Muqyry aýyldyq okrýginiń ákimi bul máseleni Kóksý aýdanynyń ákimine usynys retinde jetkizetinin aıtty. Al oblystyq polıtsııa departamenti uryny izdestirip jatyr.
«Qylmystyq kodekstiń 188-baby, ıaǵnı urlyq deregi boıynsha sotqa deıingi tergeý amaldary júrgizilip jatyr. Aıta ketý kerek, aýdandyq polıtsııa bóliminiń basshylyǵy bul isti qatań baqylaýyna aldy»,- dedi Almaty oblystyq polıtsııa departamentiniń baspasóz qyzmetiniń ókili Serik Úpıev.
