Almaty oblysynda bes bala koronavırýstan jazyldy
TALDYQORǴAN. QazAqparat - Búgin Almaty oblysynda koronavırýs ınfektsııasynan 9 adam emdelip shyqty. Onyń ishinde bes bala - 2 men 10 jas aralyǵynda, dep habarlaıdy QazAqparat tilshisi Almaty oblysy ákiminiń baspasóz qyzmetine silteme jasap.
Jazylyp shyqqan patsıentterdiń biri Kerbulaq aýdanynyń turǵyny. Eldimekenniń 34 jastaǵy turǵyny, júkti áıel úsh balasymen indetten saýyqty. Sondaı aq Eńbekshiqazaq aýdanynyń 22 jáne 29 jastaǵy aǵaıyndy turǵyndary da koronavırýstan jazyldy.
Sonymen qatar, emdelgender qatarynda 29 jastaǵy kelinshek pen bir otbasynyń eki balasy da bar. Olar Eńbekshiqazaq aýdanaralyq kópsalaly aýrýhanada 16 sáýirden bastap em alǵan bolatyn.
Eńbekshiqazaq aýdanaralyq kópsalaly aýrýhananyń bas dárigeri Jámıla Ábeýova júkti áıeldiń jaǵdaıy ortasha aýyr bolǵanyn aıtady.
«34 jastaǵy júkti áıel aýrýhanaǵa pnevmonııa dıagnozymen túsken edi. Jaǵdaıy ortasha aýyr boldy. Dárigerler júkti áıeldi qatań baqylaýda ustady. Júkti áıeldiń úsh balasynan koronavırýs eki kúnnen keıin anyqtaldy. Balalarǵa belgili algorıtm boıynsha em júrgizildi. Eńbekshiqazaq aýdanynan tirkelgen eki bala da bir otbasynyń balalary. Qazirgi ýaqytta barlyǵynyń densaýlyǵy jaqsy. Alańdaýǵa esh negiz joq», - dedi bas dáriger.
Eńbekshiqazaq aýdanaralyq kópsalaly aýrýhanada emdelgen 9 patsıentke 3 mamyr kúngi jasalǵan qaıta taldaý nátıjesi teris ekenin kórsetti.
Jalpy, Almaty oblysynda koronavırýstan jazylǵan adamdardyń sany 39-ǵa jetti.
