Almaty oblysynda báıge uıymdastyryldy degen aqparat jalǵan - ákimdik
TALDYQORǴAN. QazAqparat - Almaty oblysynyń Alakól aýdanynda at jarysy uıymdastyryldy degen aqparatty ákimdik joqqa shyǵardy, dep habarlaıdy QazAqparat tilshisi.
«Alakól aýdanynyń ákimdigi 25 naýryz kúni Eńbekshi jáne Janama aýyldyq okrýgterine qarasty «Kókıirim« degen jerde ákimdik jáne halyq tarapynan eshqandaı is-shara uıymdastyrylmaǵanyn habarlaıdy. Aýyldyq okrýg ákimderi men ýchaskelik ınspektorlar tekserý júrgizdi. Sondaı-aq, jiberilgen aýdıo-vıdeolar buryn túsirilgen jáne jiberilgen aqparattar shyndyqqa janaspaıdy», - delingen Alakól aýdany ákiminiń baspasóz qyzmeti taratqan habarlamada.
Aıta keteıik, buǵan deıin áleýmettik jáne WhatsApp jelisi arqyly Alakól aýdanynda báıge uıymdastyryldy degen habar taraǵan bolatyn. Jeli qoldanýshylary eldegi tótenshe jaǵdaı kezinde mundaı sharanyń ótýine qarsy narazylyǵyn bildirdi.
