Almaty oblysynda «Batys Eýropa - Batys Qytaı» jobasy jóninde qoǵamdyq tyńdaýlar ótti
ASTANA. 13 qazan. QazAqparat. Ótken aptada QR Kólik jáne kommýnıkatsııa mınıstrliginiń Avtomobıl joldary komıteti «Batys Eýropa - Batys Qytaı» halyqaralyq tranzıttik dáliziniń «Almaty - Horgos» qurylys ýchaskesiniń jobasy jóninde qoǵamdyq tyńdaýlar ótkizdi,
dep habarlady QR Kólik jáne kommýnıkatsııa mınıstrliginiń baspasóz qyzmeti.
Tranzıttik dáliz ótetin óńirdiń jurtshylyǵymen kezdesýlerdi ótkizýdiń basty maqsaty - júrgizilgen jobalyq-zertteýlik jumystardyń tusaýkeseri, týyndaýy múmkin máseleler men olardy sheshýde járdemdesý sharalary, tapsyrys berýshiler, merdigerler, jergilikti atqarýshy organdarmen jáne t.b. baılanysýdyń ádisteri men formalary týraly qoǵamdy aqparattandyrý, onyń ishinde, jobaǵa qatysty múddeleri bar jer ıelerine aqparat berý bolyp tabylady.
«Qazjoba» JShS jáne «Qazaqstan joldary» AQ bas jobalaýshylarmen kezdesý barysynda jurtshylyqqa oblystyń jáne barlyq engizilgen jáne kelisilgen ózgertýlermen qosa jeke aýdandardyń aýmaǵy arqyly ótetin joldyń jobasyna tolyq sıpattamasy usynyldy. QR Kólik jáne kommýnıkatsııa mınıstrliginiń Avtomobıl joldary komıtetiniń mamandary respýblıkanyń ekonomıkasyna jáne jalpy óńir úshin de jobanyń mańyzdylyǵy týraly túsiniktemeler berdi.
Jobany aqparattyq qoldaý maqsatynda, sondaı-aq, «Suraq-jaýap», «Baılanys» aıdarlary arqyly onlaın rejıminde qatynasýǵa múmkindik beretin «Jańa Eýropaǵa jol» (www.europe-china.kz) atty arnaıy saıttyń tusaýkeseri boldy.
Tyńdaýǵa qatysýshylar Dúnıejúzilik banktiń qonys aýdarý saıasatymen, sonymen qatar, problemalyq máseleler jónindegi shaǵymdar men joldamalardy qanaǵattandyrý mehanızmderimen tanysty. Sondaı-aq, jeke menshik ıelerine Dúnıejúzilik banktiń talaptaryna sáıkes Qorshaǵan ortaǵa áser etý baǵasynyń josparyn daıyndaý týraly aqparat berildi. Qatysýshylarǵa «Jeke menshik ıelerine jáne jerdi paıdalanýshylarǵa memlekettik qajettilikter úshin jerlerdi májbúrlep ıesizdendirý kezindegi quqyqtar men ótem aqylar týraly aqparat» kitapshalary usynyldy.
Jurtshylyqpen júrgizilgen kezdesýlerdiń mańyzdy bóligi úı jáne jabaıy janýarlar úshin mal ótpelerin, aýylsharýashylyq tehnıkasy úshin ótetin oryndar ornatý, shaǵyl qumnyń kóshýinen qorǵaý, topyraq karerlerin rásimdeý jáne jergilikti halyqty jumysqa ornalastyrý máselelerin talqylaýǵa arnaldy.
Sonymen qatar, jer ıeleri qurylys jumystarynyń bastalýy, ótem aqylardy tóleý tártibi, jobalanyp jatqan joldardyń tehnıkalyq parametrleri týraly máselelerge qyzyǵýshylyq tanytty. Tyńdaýǵa qatysýshylar osy jáne basqa da suraqtaryna tolyq jaýaptar aldy.
