Almaty oblysynda «Batyr babalar» memorıaldy kesheni ashyldy
TALDYQORǴAN.QazAqparat - Búgin Qarasaı aýdanynda sáýleti qaıtalanbas erekshe «Batyr babalar» memorıaldy kesheniniń ashylýy ótti. Bul joba «Rýhanı jańǵyrý» baǵdarlamasy aıasynda oblystyq ákimdik pen óńir metsenattarynyń birlesip atqarǵan jumysynyń jemisi, dep habarlaıdy QazAqparat óńir basshysynyń baspasóz qyzmetine silteme jasap.
Osynaý ataýly kúnimen aýdan turǵyndaryn oblys ákimi arnaıy baryp quttyqtady. Saltanatty sharanyń ashylýynda batyrlardyń erligin pash etetin teatrlandyrylǵan kórinis qoıyldy. Sodan keıin jınalǵandar aldynda oblys ákimi Amandyq Batalov sóz sóıledi.
«Barshańyzdy «Batyr babalar» memorıaldy kesheniniń ashylýymen quttyqtaımyn. Bul biz úshin «Rýhanı jańǵyrý» baǵdarlamasyn júzege asyrý aıasyndaǵy mańyzdy jobalardyń biri. Memleket basshysy Nursultan Ábishuly Nazarbaev atap ótkendeı, el tarıhyn, batyr babalarymyzdyń esimin jadymyzda ustaý erteńimiz úshin óte mańyzdy. Búgingi ashylyp otyrǵan memorıaldy keshenniń jetisýlyq óskeleń urpaqty otansúıgishtikke tárbıeleýdegi alar orny erekshe bolatyndyǵyna senim bildiremin», - dedi A. Batalov.
Sonymen qatar, keshenniń ashylý saltanatynda metsenat, general-maıor A.Shpekbaev, Qarasaı aýdanynyń Qurmetti azamaty S.Jylqybaev pen Ýshınskıı atyndaǵy orta mekteptiń 8 synyp oqýshysy Darhan Shafhatov óz quttyqtaýlaryn jetkizdi.
Memorıaldy keshen ekspozıtsııalary bir úlken zaldan jáne úsh taqyryptyq bólikten turady. Olar: «Saq dáýirinen Alash Orda úkimetiniń qurylýyna deıin», «Táýelsizdikke jetýge eleýli úles qosqan ataqty handar men bıler», «Erligimen týǵan jerdiń dańqyn asqaqtatqan batyrlar», dep atalady.
Ekspozıtsııada keskilesken urystar men el taǵdyry qyl ústinde turǵan alma-ǵaıyp zamanda óziniń erligimen talaı jaýdyń betin qaıtaryp, ulan ǵaıyr atyrapty urpaǵyna saqtap qalǵan ataqty handar men bıler, batyrlar men el táýelsizdigine úlesin qosqan adamdardyń portretteri beınelengen. Ekspozıtsııanyń ortalyq tusynda batyr babalarǵa taǵzym kórsetýdi áspetteıtin kompozıtsııa beınelengen.
Esterińizge salar bolsaq, memorıaldy keshenniń qurylysyn «Dáýlet Serpin 603» JShS merdiger qurylys mekemesi júrgizdi. Nysannyń ornalasqan jalpy jer aýmaǵy - 1,04 ga. Keshenniń aınalasyna dekoratıvti shyrshalar men kóshetter otyrǵyzylyp, tolyqtaı abattandyrylǵan. Mýzeı ǵımaraty oblys metsenattarynyń qarjysyna, al ishki ekspozıtsııalarynyń qurylysy Almaty oblysy ákimdiginiń tapsyrysy boıynsha salyndy. Memorıaldy keshendi kútip-ustaýǵa oblystyq mádenıet, arhıvter jáne qujattama basqarmasy jaýapty dep bekitildi.
