Almaty oblysynda balyq aýlaýǵa qatań tyıym salyndy
TALDYQORǴAN. QazAqparat - Qoldanystaǵy zańnama talaptaryna sáıkes 5 sáýirden bastap sý qoımalarynda balyq aýlaýǵa tyıym salynǵan. Osyǵan oraı Almaty oblysynyń tártip saqshylary kóktemgi ýyldyryq shashý kezeńinde balyqty zańsyz aýlaýshylardyń jolyn kesý maqsatynda túrli sharalar uıymdastyrýda, dep habarlaıdy QazAqparat tilshisi.
23 sáýir kúni oblystyq polıtseıler tabıǵat qorǵaý ınspektsııasymen birlesken reıd barysynda zańsyz balyq aýlaǵan Balqash aýdanyndaǵy Aqqum aýylynyń mańynda 42 jastaǵy Qaraǵandy oblysynyń turǵynyn ustady. «Kúdiktiden «ıAMAHA-90» markaly aspaly qozǵaltqyshty «AMÝR» qaıyǵy, plastıkalyq qyl jipten jasalǵan aý jáne basqa jabdyqtar men aýlanǵan balyq tárkilendi. Derek boıynsha QR Qylmystyq kodeksiniń 335-babyna sáıkes tergeý amaldary júrgizilýde. Memleketke 300 myńǵa jýyq materıaldyq shyǵyn keltirilgen», - dep atap ótti oblystyq Tabıǵat qorǵaý polıtsııasynyń ınspektory Baǵlan Rymjanov.
Sonymen qatar, tártip saqshylary 20 kún ishinde «Ýyldyryq shashý» jedel aldyn alý is-sharasy barysynda 50-den astam hattama toltyryp, 8 tulǵaǵa qatysty tabıǵat qorǵaý zańnamasy boıynsha qylmystyq is qozǵalǵanyn jetkizdi.
Óz kezeginde, polıtseıler is-sharanyń mamyr aıynyń sońyna deıin jalǵasatynyn aıtyp, oblys turǵyndaryn balyqtardyń ýyldyryq shashýyna kedergi keltirmeýge shaqyrady.
