Almaty oblysynda Balqash kólin saqtap qalý maqsatynda jumystar jalǵasýda
TALDYQORǴAN.QazAqparat - Almaty oblysynda Balqash kólin saqtap qalý maqsatynda jumystar jalǵasýda, dep habarlaıdy QazAqparat Almaty oblysy ákiminiń baspasóz qyzmetine silteme jasap.
Balqash kóliniń negizgi bóligin Іle men Qaratal ózenderi quraıdy. Kóldi qutqarýdyń basty sharalary da osy ózenderdiń mańynda júrgizilýde. Osy oraıda, Almaty oblysy atalmysh ózenderdiń arnalaryn qum-qaırańnan tazalaý men túbin tereńdetý jumystaryna erekshe nazar aýdaryp otyr. Bul óz kezeginde Balqashtyń tutas ekologııalyq júıesine oń áserin tıgizip, sý qoryn molaıtýmen qatar florasy men faýnasyn saqtap qalýǵa, balyq sharýashylyǵyn qaıta jandandyrýǵa septigin tıgizýde.
Máselen, Іle ózeniniń Balqash aýdany tusyndaǵy tarmaǵynyń 33,4 shaqyrymyn tazartýǵa bıylǵy jyly 70,7 mln. teńge bólindi. Al Qaratal ózeniniń arnasyn tazalaý jumystary úshin arnaıy qurylǵan «Qaratal» melıoratıvti-mehanıkalandyrylǵan otrıady sońǵy 3 jylda ózenniń 27 shaqyrymyn tazalaǵan. Tabıǵı resýrstar jáne tabıǵatty paıdalanýdy retteý basqarmasy basshysynyń orynbasary Qanat Dáýrenbekovtiń aıtýynsha, bıylǵy jyly Іle jáne Qaratal ózenderiniń tarmaqtaryn mehanıkalyq tazartý boıynsha 4 joba ázirleýge oblystyq bıýdjetten 41,1 mln. teńge bólindi. Qazirgi kezde 1 joba júzege asyrylyp, 3-eýi ekinshi jartyjyldyqta oryndalady dep josparlanyp otyr.
Kóktem shyǵa «Balqash» melıoratıvti-mehanıkalandyrylǵan otrıad mamandary Іle ózeniniń tarmaǵy sanalatyn Topar ózeniniń boıynda tazartý jumystaryn bastady. Buǵan deıin qamys pen batpaq qaırańǵa shylanǵan sý Balqashqa jetpegenimen qosa, jaıylyp, Topar aýylyn, aýyldyń shabyndyq jerleri men jaıylymdyq jerlerin sý basý qaýpin týdyrǵan edi. Bul arnany tazalaý arqyly atalǵan máselelerdiń barlyǵynyń sheshimi tabylatyn bolady.
Bıylǵy jyldyń shilde aıynyń sońyna deıin melıoratıvtik otrıad Topar ózeniniń barlyq 33 shaqyrymyn túgeldeı qamtymaq. Búginge deıin 27 tehnıka jumyldyrýdyń arqasynda ózenniń 20 shaqyrymy tazartylyp úlgergen. Bul jumys qarasha aıynda aıaqtalady. Odan keıin Іle ózeniniń basqa da tarmaqtary tazartylatyn bolady.
Oblystyq tabıǵı resýrstar jáne tabıǵatty paıdalanýdy retteý basqarmasynyń bólim basshysy Nurlan Shaıahmetovtiń aıtýynsha, Balqashty qutqarýǵa baǵyttalǵan sońǵy jyldardaǵy jumystardyń nátıjesinde 15 myń sharshy shaqyrym jaıylymdyq jer sharýalardyń ıgiligine qaıtadan qyzmet ete bastaǵan. Oǵan qosa Balqash kólindegi balyq aýlaý deńgeıi birneshe esege artqan. Jalpy sońǵy on eki jylda Іle men Qaratal ózeni ańǵarlarynyń 641 shaqyrymy tazartyldy. Bul másele oblys basshylyǵynyń turaqty baqylaýynda.
