Almaty oblysynda bala kútýshi áıel sábıdiń ólimine aıyptalyp otyr
Almaty oblysy prokýratýrasynyń málimetinshe, 25 naýryzda Talǵar aýdandyq polıtsııa basqarmasynyń kezekshi bólimine áıel júginip, 30 jastaǵy bala kútýshige shara qoldanýdy suraǵan. Aıtýynsha, bala kútýshiniń úıinde 2 jasar sábıi kóz jumǵan.
«Sh. esimdi azamatsha 5-6 aıdan beri ata-anasynan aqy alyp, kishkentaı balaǵa kútýshi retinde qarap júrgen.
Sol kúni-aq bul fakti Sotqa deıingi tergep-tekserýdiń biryńǵaı tizilimine QR Qylmystyq kodeksiniń 141-baby, 2-bóliginde (Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý) qarastyrylǵan qylmystyq quqyqbuzýshylyq belgisi boıynsha tirkeldi.
26 naýryzda qylmystyq quqyqbuzýshylyqty 141-baptyń 2-bóliginen QR QK-niń 99-baby, 3-bóligine (Adam óltirý) aýystyrý týraly sheshim qabyldandy», - dep habarlady Almaty oblystyq prokýratýrasynyń baspasóz hatshysy Maqsat Ábirov.
6 sáýirde Talǵar aýdany PB tergeýshisi aýdan prokýratýrasyna eki aı merzimge «qamaýda ustaý túrindegi» bultartpaý sharasyn bekitý týraly ótinish joldady. Talǵar aýdanynyń prokýratýrasy ótinishti qoldap, qaraý úshin tergeý sotyna jiberdi.
Qazirgi ýaqytta sotqa deıingi tergeý jalǵasyp jatyr, birqatar saraptama taǵaıyndaldy. QR QPK 201-babyna sáıkes, basqa aqparat jarııa etýge jatpaıdy.