Almaty oblysynda bal óndirisi qolǵa alyndy
TALDYQORǴAN. QazAqparat - Almaty oblysynyń Alakól aýdanyndaǵy Lepsi aýylynda bal óndirisi jandanýda. Bıyl aýyl omartashylary 300 tonnaǵa deıin bal jınap, ótkizýdi josparlap otyr, dep habarlaıdy QazAqparat tilshisi.
Ónimdi halyqaralyq talaptarǵa saı ydystarǵa quıyp, shetelge eksportqa shyǵarýǵa byltyr ashylǵan bal tsehy múmkindik berdi. Lepsiniń baly osydan 1 ǵasyr buryn da álemge tanymal bolǵan. Oǵan 1913 jyly Reseı Imperatory Romanovtar áýletiniń 300 jyldyǵyna oraı baldy Lepsiden arnaıy aldyrǵany týraly tarıhı derekter kýá. Lepsidegi bal tsehy tek osy aýyldyń omartashylarynyń balyn qabyldaıdy. Onda da arnaıy zerthanada sapasyn tekserip, biraq alady.
Aýylda 40-tan astam omartashy bal ótkizýde. Kásiporynda 15 adam eńbek etedi. Ortasha jalaqysy 60 myń teńge. Jumysshylardyń basym bóliginiń óz omartalary bar. Ár bir qyzmetker óz qolynan shyqqan ónimniń shet el asyp eksporttalyp jatqanyn maqtan tutady.
Flıýra Eskendirova kásiporyn ashylǵaly beri eńbek etýde. Bir kezderi jınaǵan baldy qolǵa túsken ydysqa salyp, odan keıin ony alatyn adam tappaı esteri shyǵatynyn jasyrmaıdy. Al qazir 30 túrli ydysqa salynǵan bal Birikken Arab Ámirlikteri men Reseıge jóneltelýde. Bul otandyq ónimniń jańa beleske ótýiniń belgisi degen pikirde. Al tseh basshysy Farhad Abýzıarov bir qasyq bal jınaý úshin bal arasy ekvatordyń uzyndyǵyndaı jerdi ushyp ótedi. Sondaı-aq tek Lepsi aýylynyń baly dárilik qasıeti joǵary ekenin tilge tıek etti. Sebebi dál osy aımaqta bal arasy qonatyn 200-den astam ósimdik bolsa, onyń 40-tan astam túri dárili shópter.
Aıta ketý kerek, Lepsiniń baly Almaty oblysynda ótken «Qazaqstannyń úzdik taýary» baıqaýynda «Úzdik azyq-túlik taýarlary» atalymy boıynsha birinshi oryn ıegeri atandy. Endi olar respýblıkalyq baıqaýǵa qatysatyn bolady.
