Almaty oblysynda baq ósirý isi jandanyp keledi
TALDYQORǴAN. QazAqparat - Almaty oblysynda baq ósirý isi jandanyp keledi. Máselen, Jambyl aýdanyndaǵy «Green farm» sharýa qojalyǵy bıyldan bastap úsh jyl ishinde 220 myń dana jańǵaq aǵashynyń «Chandler», «Franket» sortty kóshetterin 800 gektar aýmaqqa otyrǵyzýdy kózdep otyr, dep habarlaıdy QazAqparat Almaty oblysy ákiminiń baspasóz qyzmetine silteme jasap.
Jobanyń alǵashqy kezeńindegi ınvestıtsııa kólemi 1,8 mlrd. teńgeni quraıdy. «Jýyrda 200 gektarǵa 40 myń kóshet ektik. Baqtyń 400 gektaryna tamshylatyp sýarý ádisin qoldanatyn bolamyz. Ol úshin qazirgi kezde 2 uńǵyma burǵylanyp, frantsýz tehnologııasy boıynsha sý jınaý úshin 5 myń tekshe metrlik eki basseınniń qurylysy aıaqtaldy. Jalpy bir aǵashtan alǵashqy 4-5 jylda 5 kılogramnan, odan keıingi 10-11 jylda 180 kelige deıin ónim alamyz dep josparlap otyrmyz», - dedi sharýashylyq basshysy Mahmet Mımıkenov.
Oblys əkimi Mımıkenovter otbasynyń bul ıgi bastamasyna «Bıznestiń jol kartasy - 2020» memlekettik baǵdarlamasy boıynsha qoldaý sharalaryn qarastyrýdy oblystyq kəsipkerlik jəne IID basqarmasynyń basshysy M. Muratqa tapsyrdy.
Sapar barysynda sý jəne gazǵa arnalǵan polıetılen qubyrlaryn, flantster, fıtıngter shyǵaratyn «Plast invest» zaýytynyń tsehtarynda bolyp, jumys barysymen tanysty. Zaýyt ótken jyldyń 9 aıynda 1912,6 mln. teńgeniń ónimin óndirgen.
Sút óndirisi de oblys ákimi Amandyq Batalovtyń nazarynan tys qalǵan joq. Qaraqystaq aýylyndaǵy «Tabys» sharýa qojalyǵynyń 600 basqa arnalǵan sút kesheni ónimdi eńbek etýde. Onyń jobalyq quny 1 mlrd. 780 mln. teńgeni quraıdy. Sút keshenine Ýkraınadan 300 bas asyl tuqymdy sıyr satyp ákelingen. Keshen jylyna 6 tonna sút shyǵaratyn qýatqa ıe.
Keshen dırektory Talǵat Estibekovtiń aıtýynsha, aldaǵy ýaqytta sút óńdeıtin zaýyt salý josparlanyp otyr. Ol úshin arnaıy jer bólinip, qujattary daıyndalǵan.
Óńir basshysy «Almaty Suńqar qus fabrıkasy» JShS-ne arnaıy bardy. Jobalyq quny 1,2 mlrd. teńgeni quraıtyn zaýyt naryqta 2012 jyldan beri eńbek etýde. 2016 jyly munda 42,4 mln. dana jumyrtqa óndirildi. Bıylǵy jyly 80 mln. dana, 2018 jyly 130 mln. dana jumyrtqa óndirý josparlanǵan. 750 mln. teńgege fabrıkada keńeıtý jáne jańǵyrtý jumystary júrgizilip, jańa qural-jabdyqtar men qus basy satyp alyndy. Munda jumys isteıtin 80 adamnyń eń tómengi jalaqysy 172 myń teńge. Bul týraly oblys basshysyna fabrıka dırektory Dmıtrıı Chalyh baıandady. Amandyq Batalov jumysshylaryna jaǵdaı jasap, barlyq zańnama talaptaryna saı jumys istep otyrǵan osyndaı kəsiporyndar basqalarǵa úlgi bola alatynyn aıtty.
Jambyl aýdanyna jasaǵan jumys saparynyń sońynda oblys basshysy Uzynaǵash aýylynyń egjeı-tegjeıli josparymen tanysty.
«Jambyl aýdany jer bederi jaǵynan da, klımaty jaǵynan da aýyl sharýashylyǵy boıynsha klaster qurýǵa óte qolaıly aımaq. Búgingi kórgen «Imperııa Fýd» JShS-nyń aınalasynda et klasterin qurý kerek. Shaǵyn sharýashylyqtardy kooperatıvterge biriktirýdiń bazasynda osyndaı irgeli, jańa tehnologııamen jumys isteıtin, sapaly ónim shyǵaratyn, tehnıkalyq jaǵynan qamtamasyz etilgen kəsiporyndar bolsa, ónimin ótkizý, tasymaldaý jaǵynan sharýalarǵa da qolaıly bolar edi. Jalpy otandyq kəsiporyndardy, óz ónimderimizdi qoldaý sharalaryn nyǵaıta túsýimiz kerek, - dedi sapar sońynda Amandyq Batalov.
