Almaty oblysynda azyq-túlik ónimderin óndiretin zaýyt salynyp jatyr
TALDYQORǴAN. QazAqparat - Búgin Almaty oblysynyń ákimi Amandyq Batalov jumys saparymen Qapshaǵaı qalasynda boldy, dep habarlaıdy QazAqparat tilshisi Almaty oblysy ákiminiń baspasóz qyzmetine silteme jasap.
Jumys sapary barysynda oblys basshysy Zarechnyı aýyldyq okrýgindegi azyq-túlik ónimderin óndiretin zaýyttyń qurylysymen tanysty. 13,5 ga alańǵa ornalasatyn zaýyt táýligine 90 tonna tamaq óndirýge qaýqarly bolmaq. Qazirgi kezde munda jer tegisteý isi aıaqtalyp, geodezııalyq jumystar, syrtqy elektr, sý jáne káriz júıeleriniń qurylys-montajdaý jumystary júrip jatyr. Jalpy smetalyq quny 6,4 mlrd. teńge. Zaýyt shyǵarylǵan ónimderin Mońǵolııa, Ózbekstan, Qyrǵyz, Qytaı elderine eksportqa shyǵaratyn bolady. Oblys ákimi A. Batalov mundaı asa iri ınvestorlarǵa memleket tarapynan qoldaý kórsetiletinin, aldaǵy ýaqytta zaýyt ýchaskesiniń shekarasyna deıin tabıǵı gaz jetkiziletinin aıtty.
