Almaty oblysynda azyq-túlik qory jetkilikti
Turaqtandyrý qorynda quny 26,8 mln. teńge bolatyn 121,7 tonna taýar bar, - dep habarlaıdy QazAqparat tilshisi Almaty oblysy ákiminiń baspasóz qyzmetine silteme jasap.
Atap aıtqanda, bıdaı uny – 94 tonna, qant – 27,7 tonna. Azyq-túliktiń 19 túrinen turatyn áleýmettik mańyzdy taýarlar baǵasynyń ósýine jol bermeý maqsatynda oblystyq kásipkerlik jáne ındýstrıaldy-ınnovatsııalyq damý basqarmasy «Jetisý» ÁKK-men birlesip turaqtandyrý qorynda, óndirýshi kásiporyndarda, qoımalarda azyq-túlik taýarlarynyń qory qansha ekenine turaqty baqylaý jasap, monıtorıngileıdi.
Oblystyq kásipkerlik jáne ındýstrıaldy-ınnovatsııalyq damý basqarmasynyń habarlaýynsha, oblys ákiminiń tapsyrmasymen halyqty azyq-túlikpen jáne birinshi kezektegi qajettiliktermen úzdiksiz qamtamasyz etý úshin bıýdjetten qosymsha 2 mlrd. teńge bólindi. Sonyń 1 mlrd. teńgesi – áleýmettik mańyzy bar azyq-túlik taýarlaryn satyp alý ınterventsııasyn júrgizýge, 1 mlrd. teńgesi – kásipkerlik sýbektilerine zaımdar berý úshin qarastyryldy. Bólingen qarjyǵa qosymsha 5,9 myń tonna un, 100 tonna kúrish, 20 tonna rojkı, 5 myń lıtr kúnbaǵys maıy, 1000 tonna qant, 200 tonna kartop, 100 tonna pııaz ben 1 tonna tuz satyp alý josparlanǵan. Nannyń baǵasyn yryqtandyrý maqsatynda 2019 jyldyń ІV toqsanynda birinshi surypty bıdaı unyn jetkizýge 52 naýbaıhanamen agenttik kelisimder jasaldy. Bul maqsatqa «Jetisý» ÁKK-niń aınalymdaǵy qarjysynan 260 mln. teńge bólindi. Sol sııaqty zaım berýdiń negizgi sharttary bekitildi. Qazirgi kezde kásipkerlik sýbektilerin irikteý jumystary júrgizilip jatyr.
Sonymen birge búgingi kúni «Jetisý» ÁKK «Alel Agro» (qus eti), «Sary-Bulaq» (taýyq jumyrtqasy), «Úshtóbe-Aıdyn» (sút ónimderi), «Nur Agro» (pııaz) JShS-lary men «MPS» (sıyr eti) mal sharýashylyǵy kesheni sııaqty taýar óndirýshilermen yntymaqtastyq týraly memorandýmdar jasasty. Jasalǵan osy memorandýmdarǵa sáıkes taýar óndirýshiler birinshi kezektegi qajetti azyq-túlik taýarlarymen tómen baǵada oblystyń saýda nysandaryn qamtamasyz etedi. Arzandatylǵan taýarlar satylatyn saýda nysandarynyń tizimi jasaldy, búgingi kúni osyndaı 17 dúken belgilendi. Jetkizýshilerdiń joǵaryda atalǵan taýarlardy jiberý baǵasy naryqtaǵydan 10-15% tómen bolady.
Sondaı-aq oblysta 295 áleýmettik saýda oryndary, 174,3 myń tonnalyq 141 jemis-jıdek qoımasy, jalpy alańy 96 ga 100 jylyjaı, 103 mal bordaqylaý alańy (jylyna 25,6 myń tonna et) jáne 76 sút-taýarly ferma (87 myń tonna sút) jumys isteıdi.
Áleýmettik mańyzdaǵy taýarlar baǵasynyń ósýine jol bermeýge baǵyttalǵan jumystar jalǵasady.
