Almaty oblysynda aıyppul tólemegen kólikter aıyp turaǵyna qoıylyp jatyr
TALDYQORǴAN. QazAqparat - Almaty oblysynyń tártip saqshylary jol qozǵalysy erejelerin buzyp, salynǵan aıyppuldy tóleýden jaltarǵan júrgizýshilerdi anyqtaý is-sharasyn uıymdastyrdy. Sot oryndaýshylarymen birlesken is-shara óńirdiń barlyq avtojoldarynda júrgizilýde, dep habarlaıdy QazAqparat tilshisi.
Aıyppul salynǵan kólikterdi «Krıs-P» jyljymaly fotoradar kesheni aıqyndady.
«Jyl basynan foto-beınetirkeý kameralary arqyly anyqtalǵan jol erejesin buzý derekteri boıynsha 34 mıllıon teńgeden astam aıyppul salynǵan. Belgilengen merzimde tólengen aıyppul shamamen - 1 mıllıon teńge. Osyǵan oraı, jeke sot oryndaýshylarymen birlesip, aıyppuldardy májbúrlep óndirip jatyrmyz. Negizinen, «shekteý qoıylǵan» kólikterdi izdestirý boıynsha jumys júrgizilýde. Eskertýdi elemegen kólikter arnaıy turaqqa qoıylady»,- dep málimdedi Ákimshilik polıtsııa basqarmasynyń erekshe tapsyrmalar jónindegi aǵa ınspektory, polıtsııa maıory Vladımır Kostrıtsyn.
Bir kún ishinde «Almaty-Kókpek-Kóktal» jáne «Almaty-Bishkek» avtojolynda quqyq qorǵaý organdary 100-ge jýyq tártip buzýshyny anyqtap, keı kólikterdi arnaıy avtoturaqqa jiberdi.
«Arnaıy turaqqa qoıylǵan tártip buzýshynyń avtokóligi salynǵan aıyppul sanktsııalarynyń somasy tolyq ótelgennen keıin ǵana ıesine qaıtarylady» - dep tolyqtyrdy polıtsııa ókilderi.
