Almaty oblysynda aıyppul óndirý boıynsha arnaıy shara bastaldy
TALDYQORǴAN. QazAqparat - Almaty oblysynda polıtseıler ákimshilik aıyppuldy qasaqana tólemegendermen kúresýdi bastady, dep habarlaıdy QazAqparat tilshisi.
Almaty oblysynyń aýmaǵynda polıtsııa qyzmetkerleri jeke sot oryndaýshylarynyń óńirlik palatasynyń, memlekettik kirister organdarynyń jáne Ádilet departamentiniń ókilderimen birlesip, aıyppul, salyq mindettemelerin, alıment jáne basqa da tólemderdi tóleýden jaltarǵan júrgizýshilerdi anyqtaý maqsatynda «Boryshker» jedel-profılaktıkalyq is-sharasyn ótkizýde.
«Jedel aldyn alý is-sharasynyń birinshi kúngi jumysynyń nátıjesi boıynsha qamaýǵa alý túrindegi shekteýi bar 172 kólik toqtatyldy. Boryshkerlerge qatysty jalpy somasy 2 mln 904 myń 584 teńgege 154 qaýly oryndaldy. Aıyppul tóleý týraly 18 habarlama berildi»,- dedi Almaty oblysy PD ákimshilik polıtsııa basqarmasynyń aǵa ınspektory, polıtsııa maıory Saıat Ibraımov.
«Krıs-P» radarlyq-keshendi qondyrǵysy shekteýi bar kólik quraldaryn anyqtaýǵa septigin tıgizýde. «Qondyrǵy patrýldik polıtsııa qyzmetkerlerine sıgnal beredi, polıtsııa qyzmetkerleri óz kezeginde kólikti odan ári tekserý úshin toqtatady. Atalǵan is-shara qoldanylǵan jazany tóleýden jaltaryp júrgen boryshkerlerdi anyqtaýǵa baǵyttalǵan. Mundaı aktsııalar turaqty negizde ótkiziledi»,-dep tolyqtyrdy polıtsııa maıory Saıat Ibraımov.
