Almaty oblysynda áıelderdi tonap kelgen taksıst ustaldy
TALDYQORǴAN. QazAqparat - Almaty oblysynda áıelderdi tonaýdy kásip qylǵan 27 jastaǵy kúdikti ustaldy, dep habarlaıdy QazAqparat tilshisi.
Eńbekshiqazaq aýdany Qyzyljar aýylynyń 25 jastaǵy turǵyny 3 maýsymda polıtsııaǵa habarlasyp, belgisiz taksı júrgizýshisiniń tonaǵanyn jáne zorlyq kórsetkisi kelgenin aıtqan. Zardap shegýshi avtokóliktiń túsin men shamamen markasyn ataǵan. Polıtseıler birneshe saǵat ishinde taksıdiń markasyn, sonymen qatar kúdikti azamatty da anyqtady. Ol osy aýdandaǵy Aşysaı aýylynyń 27 jastaǵy turǵyny bolyp shyqty.
«Jedel izdestirý sharalary barysynda kúdikti ustaldy jáne aýdandyq polıtsııaǵa jetkizildi. Ol zardap shegýshiden uıaly telefon men 92 myń teńgeni tartyp alǵany anyqtaldy. Sondaı-aq, tekserý kezinde kúdiktiniń bıyl mamyr aıynda tirkelgen Esik qalasyndaǵy jas qyzdy tonaý deregine qatysy bary anyqtaldy. Eki jaǵdaıda da ol jolaýshylaryn zorlaýǵa nıettengen. Degenmen, qarsylyq kórsetken qyzdardyń zergerlik buıymdaryn, uıaly telefondaryn jáne aqshalaryn tartyp alǵan»,- dep málimdedi Almaty oblysy PD baspasóz qyzmetinen.
Qazirgi ýaqytta kúdikti ýaqytsha ustaý oqshaýlaǵyshyna qamaqqa alyndy. Tonaý jáne zorlaýǵa oqtalý derekteri boıynsha tergeý isin Eńbekshiqazaq aýdany polıtsııasy qarap jatyr
«Kúdikti shalǵaı qashyqtyqtarǵa jolaýshy tasymaldaýmen aınalysqanyn eskere otyryp, onyń oblys boıynsha tirkelgen osyǵan uqsas ózge de qylmystarǵa qatysy baryn anyqtaý jumystary júrgizilýde»,- dep tolyqtyrdy oblystyq polıtsııa ókilderi.
