Almaty oblysynda áıelderdi tonaǵan kúdikti ustaldy
TALDYQORǴAN. QazAqparat - Almaty oblysynda áıel adamdardy tonaǵan jáne qaraqshylyq jasaǵan 25 jastaǵy er adam ustaldy. Qazir kúdiktiniń ústinen Qylmystyq kodekstiń eki baby boıynsha is qozǵalyp, qamaýǵa alyndy, - dep habarlaıdy QazAqparat tilshisi.
Kúdiktini Talǵar aýdanynyń polıtseıleri qolǵa túsirdi. 25 jastaǵy azamattyń ústinen shilde-tamyz aılarynda qaraqshylyq jáne tonaý faktileri boıynsha úsh aryz túsken. Barlyq jaǵdaıda jas áıelder óz shaǵymdarynda ózara uqsas adamdy sıpattaǵan. Er adam óz qurbandaryn qorqytyp, olardyń aqshalaryn, uıaly telefondaryn, planshetterin alyp ketken.
«Bir faktiden ózge, áıelderdi tonaý derekteriniń barlyǵy Talǵar aýmaǵynda bolǵan. 24 tamyzda kúdiktiniń 22 jastaǵy qyzǵa pyshaqpen tap berý faktisi boıynsha Talǵar polıtseıleri onyń izine túsip, qolǵa túsirdi. Kúdikti 1993 jyly týǵan kórshi Eńbekshiqazaq aýdanynyń turǵyny bolyp shyqty»,- dep habarlaıdy Almaty oblysy ІІD baspasóz qyzmeti.
Kúdikti ýaqytsha ustaý ızolıatoryna qamaýǵa alyndy. QR QK 191-baby «Tonaý» jáne 192 «Qaraqshylyq» baptary boıynsha sotqa deıingi tergeý jumystary jalǵasýda.
