Almaty oblysynda áıel adam ótirik aıtqany úshin úsh jarym jylǵa sottaldy
TALDYQORǴAN. QazAqparat - Almaty oblysynda áıel adam jalǵan sóz aıtqany úshin 3 jyl 6 aıǵa bas bostandyǵynan aıyryldy, - dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 11 qarashada Talǵar aýdandyq soty QR Qylmystyq kodeksiniń 419-babynyń 3-bóligi boıynsha 31 jastaǵy aýdan turǵynyn aýyr qylmys jasady degen aıyppen kórineý jalǵan sóz jetkizgeni úshin 3 jyl 6 aıǵa bas bostandyǵynan aıyrý jazasyna kesti. Qoǵamnan oqshaýlaý túrindegi qatań úkim sottalýshynyń buǵan deıin de osy bap boıynsha qylmystyq jaýapkershilikke tartylǵanymen baılanysty boldy. 2020 jyldyń 26 naýryzynda Almaty oblysy Talǵar aýdandyq sotynyń úkimimen oǵan 3 jyl bas bostandyǵyn shekteý jazasy taǵaıyndalǵan bolatyn. Buryn jalǵan sóılegeni áshkere bolǵan áıel tıisti qorytyndy jasamaǵan jáne ishinde tanysy bar úsh er adam zorlaǵanyn aıtyp, shaǵym túsirgen.
«Sotqa deıingi tergeý barysynda tergeýshi jábirlenýshiniń jaýaptarynda birqatar qarama-qaıshylyqtardy anyqtady. Sodan keıin ótirigi áshkere bolǵan ótinish berýshi zorlyq-zombylyq deregi bolmaǵanyn moıyndady. Tanysyna degen óshpendilikpen kek alý maqsatynda jalǵan aıyptaǵany belgili boldy», - dep tolyqtyrdy Talǵar APB bastyǵy orynbasarynyń mindetin atqarýshy polıtsııa kapıtany Ǵalym Imanǵalıev.
