Almaty oblysynda avtojolǵa durys tazalaý júrgizbegen uıymǵa 83 myń teńge aıyppul salyndy
Almaty oblysynda jol-kólik oqıǵalarynyń sanyn azaıtý maqsatynda polıtseıler tıisti uıymdardyń avtojoldardy kútip ustaý talaptaryn qadaǵalaý maqsatynda tekserý júrgizedi.
«Atap aıtqanda, Almaty oblysyndaǵy jol uıymdarynyń joldaǵy qardy kúreý jumystarynyń sapasyn tekserý maqsatynda Polıtsııa departamenti Jol-tehnıkalyq ınspektsııasy bóliminiń ınspektorlary «Saryózek-Kóktal» jáne «Saryózek kentiniń aınalma avtojoldaryna» tekserý júrgizdi. Tekserý barysynda sońǵy jaýyn-shashynnan keıin joldy tazalaý jáne oǵan ınertti materıaldardy shashý jumystary tıisti deńgeıde júrgizilmegeni anyqtaldy. Salǵyrttyq nátıjesinde paıda bolǵan qar men muz jol apattaryna ákep soǵýy múmkin ekeni belgili. Osyǵan oraı, «Qazaqavtojol» JShS № 18 JPÝ jol uıymyna qatysty QR ÁQBtK-niń 631-babynyń 1-tarmaǵyna sáıkes avtojoldardy tıisti deńgeıde ustamaǵany úshin ákimshilik hattama toltyrylyp, 30 AEK mólsherinde 83 340 teńge aıyppul salyndy. Anyqtalǵan kemshilikterdi joıý týraly tıisti nusqama berildi», - dedi Almaty oblysy PD Ákimshilik polıtsııa basqarmasy bastyǵynyń mindetin atqarýshy polıtsııa polkovnıgi Serijan Ábjanov.
Jyl basynan beri Ákimshilik polıtsııa qyzmetkerleri oblys aýmaǵynda jalpy qoldanystaǵy avtojoldarǵa 1875 tekserý júrgizdi. Jol uıymdaryna anyqtalǵan kemshilikterdi joıýdy mindetteıtin 1891 uıǵarym jiberildi. Avtomobıl joldaryn kútip ustaý talaptaryn oryndamaǵany úshin quqyq qorǵaý organdary QR ÁQBtK-niń 631-babyna sáıkes 238 laýazymdy tulǵaǵa ákimshilik hattamalar toltyryp, jalpy somasy 6 mln. 611 teńgeden astam aıyppul salǵan.
