Almaty oblysynda aýyr júk kólikterine 30 mln teńge aıyppul salyndy

TALDYQORǴAN. QazAqparat - Jyl basynan beri Almaty oblysynyń kúre joldarynda 3 jarym myńnan asa avtokólik tekserilgen.  Nátıjesinde 771 hattama toltyrylǵan. Júkti shamadan tys tıep,  joldyń búlinýine jol bergenderge 30 mln teńgeden asa aıyppul salyndy, dep habarlaıdy QazAqparat tilshisi. 

Bul kórsetkish alda eselep artýy múmkin. Qazir óńirde "Aýyr salmaqty avtokólik" atty aktsııa ótip jatyr. Shara jazdyń sońǵy kúnine deıin jalǵasady. Óıtkeni memleket salǵan joldar aýyr júk tıegen kólikterdiń kesirinen osy mezgilde tez búlinedi eken. Kólik ınspektsııasy zańbuzýshylyqtardy jyljymaly tekserý beketi arqyly anyqtap jatyr.

 «Almaty oblysynda Qytaıdan shyǵatyn 15 myńǵa jýyq avtokólik tirkelgen. Olar basqa da memleketterge saparlaıdy, ruqsattary bar. Endi biz olardyń  jańadan salynǵan joldardy buzyp tastamaýyn qadaǵalaımyz», -, deıdi Almaty oblysy boıynsha kóliktik baqylaý ınspektsııasynyń bólim basshysy Azamat Toqtaqynov.

Júrgizýshilerdiń artyq júk alyp kele jatqany tarazyǵa ólsheý barysynda anyqtalady. Almaty oblysynda osy baǵytta qyzmet atqaratyn  jyljymaly bekettiń ekeýi bar. Biri Taldyqorǵan óńirinde jumys isteıdi.

«Aýyrsalmaqty avtokólikterdiń kóbi keshki saǵat 8-den keıin júre bastaıdy. Quqyqbuzýshylyqtar sol ýaqytta anyqtalady. Tólqujattaryna 36-37 tonna dep jazdyryp alady da, júk tıeıtin salmaǵymyz solaı deıdi. Negizi ol jerde úsh oıystyq bolǵandyqtan, tek 25 tonna ǵana ruqsat etilgen»,- dedi  Almaty oblysy boıynsha kóliktik baqylaý ınspektsııasynyń bas mamany Aıdar Nurymqojın.