Almaty oblysynda «Aýylym - altyn besigim» forýmy ótti
TALDYQORǴAN. Qarashanyń 17-si. QazAqparat /Sandýgash Dýısenova/ - Taldyqorǵanda «Aýylym - altyn besigim» oblystyq forýmy ótip, onda Almaty oblysynyń barlyq eldi mekenderinde qurylǵan qoǵamdyq kelisimdi qoldaý jónindegi úshjaqty toptardyń birinshi jumys jylynyń qorytyndylary qaraldy.
Oblystyq ákimdiktiń baspasóz qyzmetinen habarlaǵandaı, úshjaqty toptardyń jergilikti ákimshilikten taǵaıyndalǵan jetekshisi, ýchaskelik ınspektor men etnomádenı birlestiktiń tóraǵasy jyl boıy halyqpen kezdesip, olardyń arasynda túsindirý jáne aldyn alý jumystaryn júrgizdi. Mysal retinde Alakól aýdanynyń Qamysqala selolyq okrýgin keltirýge bolady. Aǵymdaǵy jyldyń 10 aıynda bul okrýgte birde-bir qylmys tirkelmepti.
«Biz jergilikti ákimdikpen, mektep ákimshiligimen, qoǵamdyq birlestiktermen, onyń ishinde - aqsaqaldar alqasymen, áıelder keńesimen jáne jastar odaǵymen tyǵyz qarym-qatynasta jumys isteımiz. Aýylda barlyq derlik turǵyn jumyspen qamtylǵan. Turǵyndar birin-birin burynnan biledi, bóten adamdar bolmaıdy. Ózara kıkiljińderge de sebep joq», deıdi selolyq okrýgtiń aǵa ýchaskelik ınspektory Baǵdan Qabdylov.
Forým aıasynda uıymdastyrylǵan «dóńgelek ústel» otyrysy aıaqtalǵannan keıin, úshjaqty toptyń birinshi jyldaǵy jumysynyń qorytyndysy shyǵaryldy. Barlyq aýdan oblys ákimi Serik Úmbetovtiń alǵys hatyn aldy. Іle aýdany KazTsIK selolyq okrýginiń jumysy úzdik dep tanyldy. Taldyqorǵannyń Erkinsaı jáne Ótenaı selolyq okrýgteri men Panfılov aýdanynyń Qońyróleń okrýgi jaqsy kórsetkishterge qol jetkizdi. Sondaı-aq Balqash, Alakól jáne Jambyl aýdandarynyń selolyq okrýgteri de kózge tústi.
Elimizdegi kelisim men tynyshtyq ahýalyn ári qaraı bekitýge baǵyttalǵan úshjaqty toptardyń jumystary ári qaraı jalǵasyn tappaq.
