Almaty oblysynda aýyldasyn pyshaqtaǵan kúdikti ustaldy
TALDYQORǴAN. QazAqparat - Almaty oblysynyń polıtseıleri buǵan deıin qylmystyq jaýapkershilikke tartylǵan azamatty aýyldasyna pyshaqtady degen kúdikpen ustady. Al jábirlenýshi aýrýhanada jatyr, dep habarlaıdy QazAqparat tilshisi.
Oqıǵa 15 qyrkúıek kúni Sarqan aýdanynyń Ekiasha aýlynda bolǵan. Eki turǵynnyń arasynda bolǵan janjal bireýiniń aýyr jaraqat alýymen aıaqtaldy. 33 jastaǵy azamat aýrýhanaǵa pyshaq jaraqatymen túsip, ekinshisi belgisiz baǵytta iz sýytqan.
Polıtsııa QR Qylmystyq kodeksiniń 106-babyna sáıkes «Qasaqana aýyr dene jaraqatyn salý» deregi boıynsha sotqa deıingi tergeý amaldaryn júrgizip jatyr. Atalǵan qylmysqa qatysy bar kúdiktiniń mekenjaıyn anyqtaý maqsatynda tıisti sharalar qabyldandy.
«27 jastaǵy kúdikti buǵan deıin de qylmystyq jaýapkershilikke tartylǵan. Ol týraly nusqama barlyq polıtsııa bólimshelerine joldandy. Jedel top kúdiktiniń sońyna túsip, ony Almaty qalasyndaǵy jaldamaly páterlerdiń birinen ustady. Qazirgi ýaqytta kúdikti Sarqan qalasyna jetkizildi. Sotqa deıingi tergeý isi jergilikti polıtseılerdiń óndirisinde», - dep habarlaıdy Almaty oblysy PD baspasóz qyzmeti.
Atap ótý qajet, polıtsııa qyzmetkerleri qylmys quraly bolǵan pyshaqty izdep tapty jáne ony aıǵaq zat retinde is materıaldaryna tirkedi. Zardap shekken er adam áli kúnge deıin dárigerlerdiń baqylaýynda.
