Almaty oblysynda aýyl jastary bıznesin qorǵap, 500 myń teńgeden jeńip aldy
Bul - «Qoǵamdyq kelisim» KMM uıymdastyryp otyrǵan, belsendi aýyl jastaryn qoldaýǵa arnalǵan Almaty oblysyndaǵy alǵashqy bıznes-jobalar sharasy.
Almaty oblysy ákiminiń orynbasary Rýstam Álı, joba baıqaýynyń jeńimpazdaryn quttyqtap, qýanyshyn bólisti. Ol jobany iske asyrýdyń joǵary áleýmettik mańyzyn atap ótip, jeńimpazdarǵa tabys tiledi.
«Kóptegen jas jigitter men qyzdardyń ıdeıalary bar, biraq olardy júzege asyrýǵa múmkindik joq. Endi meniń oıymsha, armandaryńyzdy iske asyrý qoldan keledi. Qazir Elbasy men el Prezıdenti Qazaqstan halqy Assambleıasyna úlken kóńil bólip otyr. Aldaǵy ýaqytta basqa da aýqymdy jobalar bolady, belsendi qatysyńyzdar», - dedi oblys ákiminiń orynbasary.
Rýstam Álı men «Qoǵamdyq kelisim» KMM dırektory Sandýǵash Dúısenova jeńimpazdarǵa qurmet gramotasy men 500 myń teńge kóleminde aqshalaı sertıfıkatty saltanatty túrde tabys etti.
Aıta keteıik, baıqaý komıssııasyna 80-nen astam joba usynyldy. Biraq bıznes ıdeıasy eń ótimdi jáne jańa naryqta ózekti 10 kásipker ǵana laıyqty marapatqa ıe boldy.
Alaıda, bul aqshalaı qarajattan basqa, jeńimpazdarǵa bıznesin alǵa jyljytýǵa qoldaý kórsetiledi. Jas kásipkerler mamandardan keńes alyp, tálimgerlermen jumys jasap, bıznes salasyna qatysty túrli taqyryptarda paıdaly dárister tyńdaı alady.
Joba bastalǵannan keıin tórt aıdan soń tálimgerler baǵdarlama nátıjesine taldaý jasaıdy jáne bıznesti ilgeriletýde túzetý engizedi.
Sonymen, Alakól aýdanynyń Lepsi aýylynan Fazyl Aıtov, Aqsý aýdany Saǵabúıen aýylynan Araı Ahmet jáne Jandos Ábýbákirov, Uıǵyr aýdanynyń Shonjy aýylynan Arkenjan Ivraımov, Kegen aýdanynyń Jalańash aýylynan Jańyl Baǵybaeva, Alakól aýdanynyń Qabanbaı aýylynan Erasyl Qydyrbaı, Qaratal aýdanynyń Úshtóbe qalasynan Móldir Saılaý, Qaratal aýdanynyń Úshtóbe qalasynan Aıdar Samyltyrov, Eskeldi aýdanynyń Aldabergenov jáne Panfılov aýdanynyń Bóribaı bı aýylynan Erbolat Toqtasyn jarty mıllıon teńgeniń ıegeri atandy.
Jeńimpazdar kórsetilgen qurmet úshin alǵysyn jetkizip, senimdi aqtaýǵa tyrysatynyn jáne bıznes-josparyn iske asyrý úshin qarqyndy jumys isteıtinin aıtty. Baıqaý jeńimpazdary atynan jıhaz daıyndaý jobasymen jeńgen Alakól aýdany Qabanbaı aýylynyń turǵyny Erasyl Qydyrbaı sóz sóıledi.
«Bul baıqaýǵa qatysý - óz bıznesimizdi odan ári damytý úshin ózindik tramplınge aınaldy. Bólingen qarajatqa árqaısymyz bızneske qajetti jabdyqty satyp alamyz. Bul biz úshin ózimizdi dáleldeýdiń úlken múmkindigi boldy, bul múmkindikti eshqashan jiberip almaý kerek. Aýyl jastaryna erekshe kóńil bóle bastaǵanyna qýanyshtymyn, osyndaı baıqaýlardyń jıi ótkizilýin qalar edim. Uıymdastyrýshylarǵa alǵysym sheksiz», - dedi ol.
Qonaqtar úshin jergilikti «Invaıt» toby jáne respýblıkalyq «Gorets» halyq bı ansambli óner kórsetti.
