Almaty oblysynda aýyl turǵynynyń kózine pyshaq suǵyp óltirgen 22 jastaǵy jigit ustaldy
TALDYQORǴAN. QazAqparat - Almaty oblysynda 30 jastaǵy jigittiń kózine pyshaq suǵyp alǵan kúdikti ustaldy, dep habarlaıdy QazAqparat tilshisi.
Bul týraly Almaty oblystyq polıtsııa departamenti baspasóz qyzmeti málim etti.
21 maýsym kúni saǵat 19:03 shamasynda Almaty oblysy Qarasaı aýdandyq polıtsııa basqarmasynyń kezekshi bólimine Qarasaı aýdanynyń Abaı aýylynan Almaty qalasynyń №7 qalalyq klınıkalyq aýrýhanasyna 30 jastaǵy turǵyn túskeni habarlanǵan. Jábirlenýshiniń sol jaq kózinen pyshaqpen jaralaǵan. Biraq ol aýrýhanaǵa jetkizý kezinde kóz jumǵan.
«Oqıǵa ornyna jetken jedel-tergeý toby qurylysshylardyń Abaı kentinde 44 jastaǵy turǵynnyń úıinde jóndeý júrgizgenin anyqtady. Qojaıynǵa túski úziliste jábirlenýshiniń tanysy kelip, ózimen birge 3 bótelke araq alyp kelgen. Spırttik ishimdik ishken jábirlenýshi men bir jumysshynyń arasynda janjal týyndaǵan. Kıkiljiń kezinde tabys tabý úshin kelgen Shymkent qalasynyń 22 jastaǵy turǵyny asúı pyshaǵymen jábirlenýshiniń kózinen urǵan. Ol birden dalaǵa shyǵyp, qojaıynnyń avtokóligin aıdap áketip, izin sýytqan. QR QK 99-baby 1-bólimi, 200-baby 1-bólimine sáıkes sotqa deıingi tergeý júrip jatyr»,- dedi Almaty oblysy polıtsııa departamentiniń resmı ókili, polıtsııa maıory Aqbota Qýanyshbekqyzy.
«Tosqaýyl» jospary jarııalandy. Ratsııa boıynsha habar alǵan «Bort 200» patrýldik polıtsııa rotasynyń ekıpaj quramyndaǵy polıtsııa leıtenanty M. Batakbaev pen polıtsııa aǵa leıtenanty A. Amangeldi «Almaty-Bishkek» avtojolynan izdestirilip jatqan avtokólikti kórip, onyń izine túsken.
Júrgizýshi polıtsııa qyzmetkerleriniń kólikti toqtatý týraly talabyn esh elemegen. Kóp uzamaı kómekke «Bort 190» jáne «Bort 24» patrýl ekıpajdary jetken. Polıtseıler qorshap alǵan soń kúdikti jóndeý júrgizilip jatqan avtojoldyń 36-shaqyrymynda kólikti basqara almaı, aýdarylǵannan keıin ustaldy.
«Kúdikti buryn da buzaqylyq jasaǵany úshin qylmystyq jaýapkershilikke tartylǵan. Qazir ol qamaqqa alyndy. Qylmyskerdi ustaýǵa nebári 30 mınýt ýaqyt qajet boldy», - dep atap ótti maıor Aqbota Qýanyshbekqyzy.
