Almaty oblysynda aýyl turǵyndarynyń energııaǵa tólegen aqshasyn alyp óz qajetine jaratyp kelgen adam ustaldy

ASTANA. QazAqparat - Almaty oblysynda energııamen qamtamasyz etý mekemesiniń qyzmetkeri tórt jyl boıy aýyl turǵyndarynyń aqshasyn jymqyryp kelgen, dep habarlaıdy QazAqparat Qarjy monıtorıngi agenttiginiń baspasóz qyzmetine silteme jasap.

Ol 2019 jyldan 2022 jylǵa deıin, ókilettigi bolmasa da, Almaty oblysynyń Qaraoı, Qýat jáne Ótegen batyr aýyldarynyń turǵyndaryna jalǵan túbirtekter berý arqyly, energııa tutynǵany úshin tólem alyp, túsken aqshany óz qajettiligine jumsaǵan.

Óziniń qylmystyq áreketin jasyrý úshin ol derekter bazasyna áriptesteriniń logınderi men parolderin paıdalana otyryp, jalǵan málimetter engizgen.

Sotqa deıingi tergeý barysynda QMA Almaty oblysy boıynsha departamenti atalǵan aýyldardyń 150-den astam turǵynyn elektr energııasynan ajyratýǵa jol bermeýge sondaı-aq 16 mln teńgege jýyq somadaǵy zalaldy óteýge shara qoldandy.

Sot «AlmatyEnergoSbyt» JShS jeke tulǵalarmen jumys jónindegi ınjenerin alaıaqtyq jasaǵany úshin kináli dep taýyp, 5-jylǵa bas bostandyǵynan aıyrdy.