Almaty oblysynda aýyl turǵyndary aýyz sýdyń tartylýyna qarsy
TALDYQORǴAN. QazAqparat - Almaty oblysynda Aqsý aýdanyndaǵy Sholaqózek aýylynyń halqy aýyldaryna aýyz sýdyń tartylýyna túbegeıli qarsy. Sebebi turǵyndar ár úıde aýyz sý sarqyrap aǵyp jatqanyn aıtady, dep habarlaıdy QazAqparat tilshisi.
Al ákimdiktegiler 28 úıi bar aýylǵa aýyz sý tartý úshin 30 mıllıon teńge aqsha bólip, jumystaryn bastap ketipti.
«Biz aýdannan, aýdan ákiminen eshkimnen sý suraǵan emespiz. Bizdiń qazirgi iship jatqan sýymyz tap-taza. Ómiri sol sýdy iship kelemiz. Aýylda bar joǵy 25 tútin bar, árqaıysynyń esiginiń aldynan aǵyp turǵan sýdy jaýyp, anaý aıdaladan qazyp, bizge sý shyǵaryp beremiz deıdi. 25 úı. Qansha sý ishedi. Bashnıa qoıady. Bashnıadaǵy sý sasıdy. Borsıdy. El aýrý bolady. Erteń oǵan kim jaýap beredi», - dedi Sholaqózek aýylynyń turǵyny Muhıt Baımuhanbetov.
Qazir 300 metr tereńdikten shyǵyp jatqan sýǵa halyq aqsha tólep jatqan joqpyz deıdi. Al jańadan aýyz sý tartylǵanda ár úıge eseptegish qural ornatylyp, sýdyń aqyly bolatynyn aýyl ákimi rastady. Qazir júrip jatqan aýyz sýdyń jumystary qarasha aıynda aıaqtalady dep josparlanýda. 
«Sholaqózek aýylyna aýyz sý tartý úshin 30 mıllıon teńge qarastyrylǵan. Bul aýylda aýyz sý 70 jyldary salynǵan, búgingi kúni tozyǵy jetip, kúrdeli jóndeýge jaramaıdy», - dedi Aqsý aýyldyq okrýginiń ákimi Nurqýat Kákimbaev.
Aqsý aýyldyq okrýgine qarasty Sholaqózek halqynyń 30 mıllıon teńge dalaǵa ushqanmen teń bolady dep jatqandary beker emes eken. Sebebi irgesindegi Kókjaıdaq aýylyna 2005 jyly aýyz sýǵa aqsha bólinip, rahatyn halyq kórmedik deıdi.
