Almaty oblysynda aýyl turǵyndary ambýlatorııanyń esik-terezelerin buzdy
TALDYQORǴAN. QazAqparat - Almaty oblysynyń ákimdigi medıtsınalyq ambýlatorııa aldynda bolǵan halyqtyń narazylyǵyna túsinikteme berdi, dep habarlaıdy QazAqparat tilshisi.
«19 sáýir, túngi saǵat 00.15-te Qarasaı aýdany Eltaı aýyldyq okrýgine qarasty Bereke aýylynda jergilikti turǵyndar aýyldaǵy dárigerlik ambýlatorııanyń aldyna jınaldy.
Olar atalmysh medıtsınalyq mekemeniń koronavırýs ınfektsııasyn juqtyrǵandarmen qarym-qatynasta bolǵandar oqshaýlandyrylatyn observatsııalyq statsıonar retinde paıdalanylatynyna narazylyq bildirdi. Eske salsaq, ambýlatorııanyń ishinde patsıentter bolmaǵan, bos turǵan.
Turǵyndar arasynan buzaqylar shyǵyp, ǵımaratqa materıaldyq shyǵyn keltirdi. Olar esik-terezelerdi buzyp, 30 tósek pen matratsty syrtqa laqtyrǵan. Jınalǵandardyń ishinde jekelegen adamdar alkogoldik mas kúıinde bolǵan», - delingen málimette.
Turǵyndarmen sóılesýge kelgen Qarasaı aýdanynyń ákimi Jandarbek Dalabaevtyń aıtqandaryna aýyl turǵyndary qanaǵattanbaı, observatsııalyq statsıonardy jabýdy talap etken.
«Mas kúıindegi azamattar Qarasaı aýdandyq polıtsııa bólimine jetkizildi. Osy oqıǵa boıynsha Qarasaı APB-da QR QK-niń 202-baby 1-bóligine sáıkes, ıaǵnı bógdeniń múlkine qasaqana zııan keltirý áreketi boıynsha qylmystyq is qozǵaldy. Tótenshe jaǵdaı kezinde zańsyz áreketti uıymdastyryp, buzaqylyqqa bastaǵany úshin kináliler qatań jazalanady.
Almaty oblysynyń ákimdigi turǵyndardy kórineý jalǵan aqparattarǵa senbeýge, tek resmı málimetterge den qoıýǵa shaqyrady», - delingen Almaty oblysy ákiminiń baspasóz qyzmeti taratqan habarlamada.
«Tekserilmegen aqparat kózderinen kórineý jalǵan málimet taratqandar, osy tektes áreketterge jol bergender QR zańnamalaryna sáıkes jaýapqa tartylady», - dedi vedomstvodan.
