Almaty oblysynda aýyl sharýashylyǵy salasynyń úzdikteri marapattaldy
TALDYQORǴAN. QazAqparat - Búgin Taldyqorǵan qalasyndaǵy І. Jansúgirov atyndaǵy Mádenıet saraıynda aýyl sharýashylyǵy qyzmetkerliriniń kúni atalyp ótti. Saltanatty jıynda jyl boıy ótkizilgen jármeńkeniń belsendileri, aýyl sharýashylyǵy taýar óndirýshileri, sharýa qojalyqtary men aýyl sharýashylyǵy ónimin qaıta óńdeý kásiporyndarynyń úzdikteri marapattaldy. Jeńimpazdardy oblys ákimi Amandyq Batalov quttyqtady, dep habarlaıdy QazAqparat tilshisi.
Mádenıet saraıynyń foıesinde aýdan, qalalardyń aýyl sharýashylyq ónimderi men óńdelgen ónimderiniń kórmesi qoıyldy. Jıynda aýyl sharýashylyǵy qyzmetkerlerin quttyqtaǵan oblys ákimi A. Batalov memleket qoldaýynyń nátıjesinde óńirdegi agrarlyq salanyń damyp kele jatqanyna qysqasha toqtalyp, osy eseli eńbektegi sala qyzmetkerleriniń úlesin atap ótti.
«Aýyl sharýashylyǵy ekonomıkanyń negizgi draıverleriniń birine aınalyp keledi. Sondyqtan da, aýyl sharýashylyǵyn damytý el ekonomıkasynyń, turǵyndardyń ál-aýqatyn arttyrýda óziniń zor úlesin qosýda. Óńirimizdegi aýyl sharýashylyǵy salasynyń ónimdiligi jyl sanap arta túsýde. Agroónerkásip salasynyń oblystyń ishki jalpy óńirlik ónimindegi úlesi 16 paıyzǵa jetýi onyń naqty dáleli», - dedi A. Batalov óz quttyqtaýynda.
Sóz sońy marapattaýmen jalǵasty. 2017 jylda ótkizilgen aýyl sharýashylyǵy jármeńkeleriniń jeńimpazy retinde Qarasaı, Talǵar, Sarqan aýdandary men Taldyqorǵan qalasy úzdikter qataryna ataldy. Aýyldyq okrýgter boıynsha Kóksý aýdanynyń Balpyq bı aýyldyq okrýgi, Jambyl aýdanynyń Úńgirtas aýyldyq okrýgi, Raıymbek aýdanynyń Alǵabas aýyldyq okrýgi, Panfılov aýdanynyń Úlkenshyǵan aýyldyq okrýgi, Kerbulaq aýdanynyń Jaınaq batyr aýyldyq okrýgi marapattaldy.Aýyl sharýashylyǵy ónimin óńdek kásiporyndary arasynda Tekeli qalasyndaǵy «Sýffle Qazaqstan» ashytqy zaýyty, Balqash aýdanyndaǵy «Agrofırma «Birlik» JShS, Talǵardaǵy «ıÝjnyı» JShS úzdik dep tanyldy. Jeńimpazdardyń barlyǵyna aqshalaı syılyq sertıfıkattary berildi. Alakóldik «Arqarly Maıbúırek» JShS «Úzdik aýyl sharýashylyǵy taýar óndirýshi», Eskeldi aýdanyndaǵy «Dıýsembınov A.K.» sharýa qojalyǵy «Úzdik sharýa qojalyǵy» atanyp, olar «Nıva» avtokóligin ıelendi. Osy eki atalym boıynsha jeńimpazdar qatarynda atalǵan Uıǵyr aýdanyndaǵy «Tasqarasý» seriktestigi, Aıqsý aýdanyndaǵy «Baqqon» AShK, ilelik «Sabyrbaev M» sharýa qojalyǵy men qarataldyq «Nur» sharýa qojalyǵy 400-600 myń teńgeniń sertıfıkatyna ıe boldy.
Sonymen qatar Aýyl sharýashylyǵy mınıstrliginiń «Eńbek ardageri» medali, «Aýyl sharýashylyǵy salasynyń úzdigi» tósbelgisi, mınıstrliktiń jáne oblys ákiminiń Qurmet gramotalary, oblys ákiminiń alǵys hattary agrarlyq sala mamandarynyń birqataryna tabystaldy.
Mereke sońy kontsertke ulasty.
Jalpy, oblysta egin sharýashylyǵynda 2016 jylmen salystyrǵanda dándi-daqyldardyń jalpy túsimi - 1,5%, qant qyzylshasy - 37,5, maıly daqyldar - 9,5, kókónis, baqsha jáne jemis, jıdek daqyldary - 3,6% artqan. Ssýarmaly sýdy únemdeý tehnologııasyn qoldaný 5,8 paıyzǵa artyp, aǵymdaǵy jyly 172 sharýashylyq 986 gektarǵa tamshylatyp sýarý ádisin engizdi. Tálimdi jerde dándik daqyldardy óndirýde 146 myń gektarda «nóldik» tehnologııa qoldanylady.Bıylǵy jyly qant qyzylshasy alqabyn 9,2 myń gektarǵa jetkizdik, (ár gektardan 360,5 tsentner) jalpy 331,5 myń tonna qant qyzylshasy óndirildi. Alynǵan ónimdi óńdeý máselesi sheshildi, Kóksý qant zaýyty modernızatsııadan ótip, úshinshi jyl tabysty jumys isteýde. Mal sharýashylyǵynda 10 aıdyń qorytyndysy boıynsha mal basy artyp, ónim kólemi 3,2 paıyzǵa ósti.
