Almaty oblysynda aýyl mektebiniń ataýy qazaqshalandy
TALDYQORǴAN.QazAqparat - Sarqan aýdanyndaǵy bilim oshaǵy aýyldyń atymen atalatyn boldy. Almaly eldi mekenindegi Novopokrovka orta mektebiniń ataýy araǵa 66 jyl salyp qazaqshalandy, dep habarlaıdy QazAqparat tilshisi.
95 jyldyq tarıhy bar oqý ordasyndaǵy bul ózgeriske aýyl jurty qýanyp otyr. Qazir Almaly mektebinde 600-den astam oqýshy bilim alady.
«Bul mektep san qyrandy samǵatqan - altyn uıa. Qazaq kúresiniń qara narlary Ábilhan Aıhanov pen Amanjol Buǵybaevtar osynda oqyǵan. Qazir dańqty sportshylardyń izin jalǵap Qazaqstan atyn álemge tanytyp júrgen shákirtter bilim alady. Máselen, Erkebulan Begasyluly álem chempıonatynyń kúmis júldegeri» deıdi Almaly orta mektebiniń dırektory Jamal Qulahmetova.
Bilim ordasy 1922 jyly bastaýysh mektep bolyp ashylǵan. 1951 jyldan beri «Novopokrovka» atymen atalyp keldi.
