Almaty oblysynda aýrýhanalardyń jumysy qalypty rejımge kóshýde
TALDYQORǴAN.QazAqparat - Almaty oblysynda koronavırýs indetin juqtyrǵandar sanynyń azaıýyna baılanysty medıtsınalyq mekemelerde ınfektsııalyq statsıonarlardaǵy tósek sany 50 paıyzǵa qysqardy, - dep habarlaıdy QazAqparat tilshisi.
Densaýlyq saqtaý basqarmasynyń basshysy Ómirzaq Nııazbekovtyń aıtýynsha, vaktsına saldyrýshylar qatarynyń artýy indettiń aldyn alýǵa septigin tıgizip otyr. Sonymen qatar basqarma basshysy turǵyndar arasynda koronavırýs ınfektsııasynyń taralýyna jol bermeý úshin oblystyq sanıtarlyq-epıdemıologııalyq baqylaý departamenti qyzmetkerlerimen birlese jumys atqaryp otyrǵanyn jetkizdi.
«Oblystaǵy ınfektsııalyq statsıonarlar júktemesiniń tómendeýine baılanysty tósek sany 4795-ten 2460-qa deıin, reanımatsııalyq tósek sany 410-nan 256-ǵa deıin qysqartyldy. Búgingi kúnnen bastap Taldyqorǵan qalasyndaǵy oblystyq aýrýhana shtattyq rejımdegi jumysyna qaıta kiristi. Osy ýaqytqa deıin oblystyq aýrýhana tek koronavırýs ınfektsııasyn juqtyrǵan adamdardy ǵana qabyldaıtyn ınfektsııalyq aýrýhana retinde jumys istep kelgen bolatyn. 7 maýsymnan bastap aýrýhanadaǵy nevrologııa, ýrologııa, hırýrgııa, neırohırýrgııa, terapııa, oftalmologııa, gematologııa, endokrınologııa, neırohırýrgııa, travmatologııa sııaqty bólimsheler naýqastardy qabyldaýǵa tolyqtaı daıyn», - dedi Densaýlyq saqtaý basqarmasynyń basshysy Nııazbekov Ómirzaq Ábilseıituly.
Aıta keteıik, Almaty oblysynda sońǵy táýlikte koronavırýstyń 54 jaǵdaıy tirkeldi. Ósý qarqyny – 0,2%, onyń ishinde 28 sımptomdyq jáne 26 sımptomsyz jaǵdaı.
KVI anyqtalǵan 54 jaǵdaıdyń 13-i 14 jasqa deıingi balalar.
Jalpy óńirde indetten 25 324 naýqas jazylyp shyqty. Bir táýlik ishinde statsıonardan 21 patsıent emdelip shyqty. 9 adam úı oqshaýlaýynan shyǵaryldy.
Jalpy Almaty oblysynda koronavırýsty barlyǵy 26 448 adam juqtyrǵan. Onyń ishinde sımptomdarmen 16 582adam.
