Almaty oblysynda aýrýhanaǵa basa-kóktep kirgen 4 adam qamaýǵa alyndy
Oqıǵa Eńbekshiqazaq aýdanyna qarasty Shelek aýylyndaǵy aýrýhanada bolǵan. Pyshaqtalǵan jábirlenýshini áldekimder izdep kelip, mekemege basa-kóktep kiredi. Aýrýhanaǵa júgirip kirgen tórt adam medıtsına qyzmetkerleriniń záresin ushyrady. Bul sát mekemedegi beınebaqylaý kamerasyna túsken.
Polıtsııanyń aqparatyna sáıkes, buǵan deıin 36 jastaǵy er adam pyshaq jaraqatymen aýrýhanaǵa jetkizilgen. Ol óziniń aýyldasymen sózge kelip qalyp, kıkiljiń sońy qylmyspen aıaqtalǵan.
Qazir pyshaq suqqan kúdiktiniń ústinen «Buzaqylyq» baby boıynsha qylmystyq is qozǵaldy. Al, aýrýhanaǵa jábirlenýshiniń artynan izdep kelgenderdiń barlyǵy anyqtaldy. Olar medıtsınalyq mekemege basa-kóktep kirip, qoǵamdyq tártipti buzǵany úshin ákimshilik jaýapkershilikke tartylyp, 15 kúnge qamaldy.
«1990, 1994, 1996 jáne 1997 jylǵy tórt adamnyń zańsyz áreketi vıdeoǵa túsken. Osy adamdar men qylmystyń negizgi fıgýranty ustalyp, qamaýǵa alyndy. Qazirgi ýaqytta jábirlenýshiniń densaýlyǵyna keltirilgen zııannyń aýyrlyǵyn anyqtaý úshin sot-medıtsınalyq saraptama taǵaıyndaldy», - dedi Almaty oblystyq polıtsııa departamenti baspasóz qyzmetiniń ókili Ernar Saıdildın.
Qoldaǵy aqparat boıynsha, janjal eki er adamnyń bir-birine durys amandaspaýynan bastalǵan.