Almaty oblysynda aýqymdy shyǵarmalar konkýrsy ótti
TALDYQORǴAN. QazAqparat - Memleket basshysynyń «Bolashaqqa kózqaras: qoǵamdyq sanany jańǵyrtý» atty maqalasynda kóterilgen «Týǵan jer» baǵdarlamasy Almaty oblysynyń mektep oqýshylary men stýdentterin shyǵarmalar konkýrsynda baqtaryn synaýǵa uıtqy boldy. Sharany Almaty oblystyq bilim basqarmasy uıymdastyrdy.
«Týǵan jer» atty shyǵarmashylyq báseke 9-11 synyptaǵy mektep oqýshylary men arnaıy, tehnıkalyq bilim berý oryndarynyń sýdentteri arasynda ótti. Baıqaý aıasynda 25 myń oqýshy men 90 stýdent ózderiniń Otany týraly kózqaras, pikirlerimen bólisti.
Atalmysh baıqaýdyń qorytyndylary týraly óńirlik kommýnıkatsııalar qyzmetinde Almaty oblystyq bilim basqarmasyna qarasty ınnovatsııalar men jańa tehnologııalar bóliminiń bas mamany Rýslan Aryslanov habardar etti.
«Óz Otanyn súıetin árbir adam onyń tarıhy týraly bilýge tyrysar haq. Osy maqsatpen biz oblysta tuńǵysh ret «Rýhanı jańǵyrý» aıasynda shyǵarmalar baıqaýyn uıymdastyrdyq. Biz aýdannan bastap, 25 myńnan astam shyǵarmalardy qabyldap, olardyń tek 150-i ǵana márege jetti. Baıqaýdyń jeńimpazdaryn bizdiń basqarmamyzdyń ókilderinen qurylǵan arnaıy komıssııa iriktedi. Úzdikterdiń qatarynda 9 synyp oqýshylary arasynan taldyqorǵandyq Zeınolla Rasýl 1-shi oryndy, Eskeldi aýdanynan Tóleýtaı Aıaýlym 2-shi oryndy, Balqash aýdanynan Dana Asqarqyzy 3-shi oryndy aldy. Sondaı-aq Tekeliden Taır Sultanbek te úzdikterdiń qatarynan kórindi. 11 synyp oqýshylary arasynan 1-shi oryndy taldyqorǵandyq Maǵjan Ospan, 2-shi oryndy Kerbulaq aýdanynan Begimaı Muhametjan, 3-shi oryndy Panfılov aýdanynan Seısenǵalı Araılym jeńip aldy. Bul baıqaý birinshi ret uıymdastyrylyp otyr, soǵan qaramastan biz onyń aýqymdylyǵyna tań qalyp otyrmyz. Sol sebepti keler jyly atalǵan baıqaýdyń qorytyndysy negizinde úzdik shyǵarmalar jınaǵyn shyǵarýdy josparlap otyrmyz»,-dedi R.Aryslanov.
Kolledj stýdentteri arasyndaǵy shyǵarmalarǵa da oryndar berildi. Baıqaýǵa qatysýshylardyń barlyǵyna qundy syılyqtar men entsıklopedııa, dımplomdar tabys etildi.
