Almaty oblysynda Aýǵan soǵysy ardagerleri arasynda respýblıkalyq jarys bastaldy
TALDYQORǴAN. QazAqparat - Almaty oblysynda aýǵan soǵysy ardagerleri arasynda voleıboldan respýblıkalyq jarys bastaldy. Jarysqa elimizdiń túkpir-túkpirinen 9 komanda jınaldy. Olar Almaty oblysy ákiminiń júldesi úshin tuńǵysh ret uıymdastyrylǵan sharada ózara baq synasady, dep habarlaıdy QazAqparat tilshisi.
Júlde qory qomaqty. Birinshi orynǵa 500 myń teńge, ekinshi, úshinshi oryndarǵa 300 jáne 200 myń teńge syılyq qarastyrylǵan. Sondaı-aq bes nomınatsııa boıynsha 5 adam 50 myń teńgeden qarjylaı syılyqqa ıe bolmaq. Jeńimpazdar esimi erteń anyqtalady.
Óz kezeginde respýblıkalyq jarystyń ótýine tikeleı qoldaý bildirgen Almaty oblysynyń ákimi Amandyq Batalov Aýǵan soǵysy jaýyngerleriniń erligin eske aldy. 
"Tarıh betterinde oryn alǵan aýyr oqıǵalardyń biri - Aýǵan soǵysy. Qıyn sátterde, ómir men ólim beldesken shaıqasta bizdiń jerlesterimizdiń erligi eshqashan umytylmaq emes. Beıbit ómirde bar erik-jigerin salaýatty ómir saltyna arnaǵan Aýǵan soǵysy ardagerlerine respýblıkalyq týrnırde jeńis tileımin" , - dedi A. Batalov. 
Aýǵandyq ardagerler atynan «Aýǵan soǵysy múgedekteriniń respýblıkalyq uıymy» qoǵamdyq birlestiginiń tóraǵasy, Keńes Odaǵynyń batyry Nıkolaı Kremenısh sóz aldy. Ol týrnırdi uıymdastyrýshylarǵa rızashylyǵyn bildirip, oıyn qatysýshylaryna sáttilik tiledi. 
Esterińizge sala keteıik, Aýǵan soǵysy ardagerleri arasynda respýblıkalyq jarys uıymdastyrý bıyl aqpan aıynda kóterilgen bolatyn . Óńir basshysyna osyndaı usynysty jetisýlyq ınternatsıonalıst jaýyngerler bildirgen edi. Birden usynysty qabyldaǵan Almaty oblysynyń ákimi búgingi jarystyń ótýine tikeleı yqpal etti. Bolashaqta alǵash ret respýblıkalyq deńgeıde ótken sharanyń aýqymyn keńeıtý josparlaýda.
Aýǵan soǵysy 1979-1989 jyldary aralyǵynda boldy. Qazaqstannan Aýǵan soǵysyna 22 myńnan astam adam qatysty. Olardyń 761-i qaza tapty. 21 adam habarsyz ketti. Búgingi tańda Qazaq elinde 10000-ǵa jýyq aýǵan soǵysynyń ardagerleri bar. Olardyń 3500 astamy múgedekter qatarynda.
