Almaty oblysynda áýejaı, avtovokzaldardyń jumysy toqtatylady
TALDYQORǴAN. QazAqparat - Almaty oblysynda áýejaı, avtovokzaldardyń jumysy toqtatylady. Budan bylaı resmı taksı qyzmetinen basqa jeke tasymaldaýshynyń júrýine tyıym salynady, dep habarlaıdy QazAqparat tilshisi.
Oblystyń bas sanıtarlyq dárigeri Qaırat Baımuhambetov Taldyqorǵanda ótken brıfıng barysynda osylaı málim etti.
Onyń aıtýynsha, Almaty oblysynda áýejaıdyń jumysy, aýdandyq, qalalyq avtovokzaldardyń, avtostansalardyń qalaaralyq, aýdanaralyq avtobýs baılanystary toqtatylyp, resmı taksı qyzmetinen basqa jeke tasymaldaýshylardyń júrýine tyıym salynady. Sonymen qatar, Almaty oblysy Shyǵys Qazaqstan jáne Jambyl oblystarymen shektesetin aýmaqtarda qosymsha sanıtarlyq beketter qoıylady. Mundaı sheshim koronavırýs indetine qaýipsizdik sharalaryn kúsheıtý maqsatynda arnaıy qaýlymen bekitilip otyr.
Jańa qaýlyǵa engizilgen talaptar 31 naýryz saǵat 00:00 den bastap kúshine enedi.
