Almaty oblysynda aýa raıy tosyn minez tanytýy múmkin
TALDYQORǴAN. QazAqparat - Almaty oblystyq Tótenshe jaǵdaılar departamenti eskertý jarııalady. Aldaǵy kúnderi aýa-raıy tosyn minez tanytýy múmkin, dep habarlaıdy QazAqparat tilshisi.
«Qazgıdromet» RMK-nyń 27 sáýirdegi málimetine sáıkes Almaty oblysy aýmaǵynda 28 sáýir men 1 mamyr aralyǵynda jańbyr jaýyp, keı jerlerde nóserletedi. Taýly aımaqtarda jańbyrdyń sońy qarǵa aınalýy múmkin. Sondaı aq keı jerlerde kún kúrkirep, burshaq jaýady dep boljanýda. Batystan soqqan jel jyldamdyǵy sekýndyna 18-23 metrge deıin jetedi. Sáýirdiń 30-nan 1-shi mamyrǵa qaraǵan túni aýa temperatýrasy 1-6 gradýsqa al keı jerde -2 gradýsqa deıin sýytady.
Sondaı-aq 28-29 sáýir aralyǵynda jaýyn-shashynnyń kóp túsiýine baılanysty ózen sýlary arnasynan asýy múmkin. Sol sebepti mamandar barynsha saq bolýdy eskertedi.
