Almaty oblysynda at jarysyna 7 kólik pen 2,3 mln teńge aqsha tigildi
TALDYQORǴAN. QazAqparat – Búgin Almaty oblysynda QR Tuńǵysh Prezıdenti – Elbasy N.Nazarbaevtyń Kýbogy úshin ulttyq at sporty túrlerinen dúbirli jarys ótti, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Konstıtýtsııa kúnine oraılastyrylǵan shara Jambyl aýdanyndaǵy «Kókbastaý» ıppodromynda uıymdastyryldy.
21-shi jyl qatarynan ótkizilip kele jatqan jarysqa elimizdiń túkpir-túkpirinen jáne kórshi memleketterden jalpy sany 200-ge jýyq báıgeshi qatysty.
Almaty oblysynyń ákimi Amandyq Batalovtyń quttyqtaýy men Jambyl aýdany aqsaqalynyń batasyn alǵan qatysýshylar jarysty bastap ketti.
Kórermenderdi qıqýlatyp, qoshemetine bólegen tartysqa toly báıgeniń «taı jarysynda» Jambyl oblysynan qatysqan «Shónger» atty júıriktiń ıesi oq boıy oza kelip, 200 myń teńge syılyqqa ıe boldy. Almaty oblysynyń Talǵar aýdanynan kelgen Merhat Bulǵynov esimdi shabandoz tizgindegen «Káýsar» atty taı máre syzyǵyn ekinshi bolyp kesip ótti. Júlde kólemi - 150 myń teńge. Úshinshi oryn Qyrǵyzstan Respýblıkasynan kelgen «Asanbek ata» at sharýashylyǵyna tıesili «Bereke» atty sáıgúlik pen onyń shabandozyna buıyrdy. Júldesi - 70 myń teńge.
Al 9 shaqyrymdyq «jorǵa jarysta» «Qabylan» atty júırigimen birge Qyrǵyz elinen qatysqan báıgeshi birinshi boldy. Márege ekinshi bolyp Atyraý oblysynyń «Asýar» atty jorǵasy jetti. Úzdik úshtikti Qyrǵyzstan Respýblıkasynan topqa túsken «Lepýchıı» atty júırik pen ony ıesi túıindedi. Jeńimpazdarǵa sáıkesinshe «Lada granta» avtokóliginiń kilti, 150 myń jáne 120 myń teńge tabystaldy.
11 shaqyrymdyq «qunan báıgede» Almaty oblysy Qarasaı aýdanynyń turǵyny «Qarlyǵashymen» birge birinshi oryn ıelendi. Ekinshi bolyp top jarǵan - «Álqıssa» atty sáıgúligimen Jambyl oblysynyń týmasy. Úzdik úshtikten «Muzbalaq» qunanymen Almaty qalasynyń turǵyny kórindi. Jeńimpazǵa «Lada Granta» avtokóligi, júldegerlerge 150 jáne 120 myń teńge aqshalaı syılyq tabystaldy.
16 shaqyrymǵa sozylǵan «top báıgede» Almaty oblysynyń Alakól aýdanynan topqa qosylǵan «Shymbulaq» atty sáıgúlik birinshi boldy. Onyń ıesine «Nıva» avtokóliginiń kilti tabystaldy. Ekinshi oryndy ıelengen Talǵar aýdanynyń (Almaty oblysy) «Ǵasyr» atty júıriginiń ıesi «Lada Granta» avtokóligin qanjyǵasyna baılady. Úshinshi oryn Qarasaı aýdanynyń (Almaty oblysy) turǵyny men onyń tulpary «Don Francheskoǵa» buıyryp, ıesi 150 myń teńgeniń sertıfıkatymen marapattaldy.
Osydan keıin at jarystyń tóresi sanalatyn 25 shaqyrymdyq «alaman báıgeniń» de kezegi kelip jetti. Oǵan elimizdiń ár túkpirinen 40-qa jýyq júırik qosyldy. Nátıjesinde jeke dara ozyp, topty jarǵan Qarasaı aýdanynyń «Qarakóz» atty júırigin tizgindegen Baıǵurman Sabyrjanǵa «ÝAZ Patrıot» avtokóliginiń kilti tabystaldy. Máre syzyǵyn ekinshi bolyp kesken Qyrǵyzstannan kelgen «Zara» atty sáıgúliktiń ıesine «Nıva» avtokóliginiń kilti syıǵa berildi. Sondaı-aq úshinshi orynǵa «Qarakózdi» erttegen Almaty qalasynyń qatysýshysy, tórtinshi oryndy «Qarlyǵashqa» mingen Qyzylorda oblysynyń týmasy taban tiredi. Júldegerlerge sáıkesinshe «Lada Granta» avtokóligi men 200 myń teńgeniń aqshalaı sertıfıkaty tabystaldy.
Jalpy búgingi báıgeniń utysyna 7 avtokólik jáne 2 mln 300 myń teńge aqshalaı júlde tigildi.
