Almaty oblysynda asyrap alǵan balalaryna qol kótergen áıel otbasymen qaıta qaýyshty

QONAEV. QazAqparat - Almaty oblysynda komıssııa asyrap alǵan balalaryna qol kótergen áıelge sol balalardy qaıtadan qaıtaryp berdi, dep habarlaıdy QazAqparat tilshisi.

Almaty oblysynyń bilim basqarmasy aqparatty rastady.

«Іle aýdany kámeletke tolmaǵandar isteri jáne olardyń quqyǵyn qorǵaý komıssııasynyń sheshimi boıynsha balalar qaıtadan sol tárbıelep jatqan áıelge qaıtaryldy»,- delingen habarlamada.

Vedomstvonyń málimetinshe, komıssııanyń quramynda aýdan prokýrory da bar.

Zýra Ómirzaqova esimdi áıel úsh jyl buryn osy tórt balany qamqorlyǵyna alǵan. Ákimdik qyzmetkerleri úıine kelip, tıisti tekserý júrgizgen. Arnaıy psıhologııalyq daıyndyqtan ótken.

Al qamqorlyǵyndaǵy jetkinshekterdiń úlkeni - on segizde, kenjesi - on úshte eken.

Aıtýynsha, balalardyń keıde janjaldasyp, bir buıymǵa talasyp qalatyn kezderi kóp. Sondyqtan daýys kóteremin deıdi.

«Osy ýaqytqa deıin meıirim kórmeı kelgen balalar ǵoı. Endi endi túzelip, mine, tórt jyldyń ishinde adam bolyp kele jatyr. Qazir bári qazaqsha sóıleıdi. Dombyrada oınaıdy. Boksqa qatysady. Kúres úıirmesine barady. Bárin isteıdi. Biraq endi bala bolǵannan keıin bir-birimin keı kezde kelise almaı qalady. Áıtpese, myna jaqta dostary da bar»,- deıdi Almaty oblysynyń turǵyny Zýra Ómirzaqova.

Ákimdik ókilderi de Zýra Ómirzaqovanyń búkil qajetti daıyndyqtan ótkenin jáne bala asyrap alýǵa úmitker retinde kezekte turǵanyn aıtty.

Ári buǵan deıin jalǵyzbasty áıeldiń eshqandaı bala tárbıesimen aınalyspaǵanyn rastady.

Tekserý kezinde balalardyń denesinen eshqandaı jaraqat tabylmaǵan. Asyrandy balalar da olardy qamqorlyǵyna alǵan anasyn aqtaǵan, jamandamaǵan.

Al Zýra Ómirzaqova balalarynyń mektep kıimderin daıyndap qoıǵanyn jáne otbasy úshin sońyna deıin kúresetinin jetkizdi.

Esterińizge sala keteıik, buǵan deıin áıel adamnyń balalarǵa ursyp, uryp jatqan vıdeosy jelige taraǵan bolatyn.

Onda áldenege ashýly áıeldiń balaǵa ursyp, balaǵattap, qolyna túsken buıymdy laqtyryp jibergeni anyq kórinedi.

Kelesi jazbada qabyrǵaǵa taqap qoıyp, tómpeshteı jóneledi. Tipti «seniń suraýyń joq, óltirip tastaıyn ba?» deıdi.

Osy vıdeony jelige júktegen jazba avtory kelinshektiń tórt balany qamqorlyǵyna alǵanyn, biraq únemi jumysqa jegip, qorlyq kórsetetinin aıtqan.