Almaty oblysynda asyrandy balalardy urǵan áıel jaǵdaıdy túsindirdi
Zýra Ómirzaqova úsh jyl buryn tórt balany qamqorlyǵyna alypty. Ol úshin ákimdik ókilderi kelip, tıisti tekserýler júrgizgen. Arnaıy psıhologııalyq daıyndyqtan ótken. Al tárbıesindegi jetkinshekterdiń úlkeni on segizde, kenjesi on úshte eken. Aıtýynsha, balalardyń keıde janjaldasyp, bir buıymǵa talasyp qalatyn kezderi kóp. Sondyqtan daýys kóteremin deıdi.
«Meıirimdi kórmeı ketken balalar ǵoı endi osy ýaqytqa deıin. Endi-endi túzelip, mine tórt jyldyń ishinde adam bolyp kele jatyr. Qazir bári qazaqsha sóıleıdi. Dombyrada oınaıdy. Boksqa qatysady. Kúreske qatysady. Bárin isteıdi. Biraq endi bala bolǵannan keıin bir-birimen keı kezde kelise almaı qalady. Áıtpese, myna jaqta dostary da bar»,- dedi Almaty oblysynyń turǵyny Zýra Ómirzaqova.
Ákimdik ókilderi de Zýra Ómirzaqovanyń barlyq qajetti daıyndyqtan ótkenin jáne bala asyrap alýǵa úmitker retinde kezekte turǵanyn aıtty. Ári buǵan deıin jalǵyzbasty áıeldiń eshqandaı bala tárbıesimen aınalyspaǵanyn rastady. Al osy janjaldan soń birden jetkinshekterdi jekemenshik balalar úıine ýaqytsha aýystyrypty. Aıtýlarynsha, balalardyń denesinde jaraqat joq. Ári olar analaryn aqtap otyr deıdi.
«Kámelet jasqa tolmaǵandar isine qatysty komıssııa otyrysy ótedi. Bári de sonda sheshiledi. Zýra Ómirzaqova qamqorshylyq quqyǵynan aıyrylýy múmkin. Bálkim, qara tizimge engizer», - dedi Іle aýdandyq qorǵanshylyq jáne qamqorshylyq organynyń bas mamany Botagóz Tólebekova.
Mamandar tórt bala da Taldyqorǵandaǵy kámelet jasqa tolmaǵandardy beıimdeý ortalyǵyna jiberilýi múmkin dedi. Ázirge olar balalar úıinde bolmaq. Al Zýra Ómirzaqova balalarynyń mektep kıimderin daıyndap qoıǵanyn jáne januıasy úshin sońyna deıin kúresetinin jetkizdi.
Aıta keteıik, bul iske qatysty Almaty oblystyq polıtsııa departamenti ákimshilik kodekstiń 127 baby boıynsha is qozǵady.
Esterińizge sala keteıik, buǵan deıin áıel adamnyń balalarǵa ursyp, uryp jatqan vıdeosy jelige taraǵan bolatyn.
Onda áldenege ashýly áıeldiń balaǵa urysyp, balaǵattap, qolyna túsken buıymdy laqtyryp jibergeni anyq kórinedi. Kelesi jazbada qabyrǵaǵa taqap qoıyp, tómpeshteı jóneledi. Tipti «seniń suraýyń joq, óltirip tastaıyn ba?» deıdi.
Al jelige júktegen jazba avtory kelinshektiń tórt balany qamqorlyǵyna alǵanyn, biraq únemi jumysqa jegip, qorlyq kórsetetinin aıtqan.