Almaty oblysynda Ashyq kóshbasshylaryna qandaı jeńildikter beriledi

NUR-SULTAN. QazAqparat – Almaty oblysynyń bas sanıtar dárigeri Erǵalı Sydymanov Ashyq kóshbasshylaryna qandaı jeńildikter beriletinin aıtty, dep habarlaıdy QazAqparat tilshisi.

«Búginde Almaty oblysy boıynsha Ashyq jobasynyń 102 kóshbasshysy bar. Bul mártebeni alǵan joba qatysýshylaryna mynadaı jeńildikter beriledi: «Qyzyl» aımaqtaǵy qatysýshylar «sary» aımaq erejesi boıynsha, «sary» aımaqtaǵy qatysýshylar «jasyl» aımaq erejesi boıynsha jumys isteıdi. Al «jasyl» jáne «qoıý qyzyl» aımaq qatysýshylarynyń jumys ýaqyty 2 saǵatqa uzartylady. Sondaı-aq, nysannyń júktelim shegi 10 paıyzǵa ulǵaıady», - degen óńirdiń bas sanıtary qyzmetkerlerin belsendi vaktsınalaǵan kásiporyndarǵa da jeńildik beriletinin eske saldy.

«Qyzmetkerleriniń keminde 90 paıyzy vaktsınanyń birinshi komponentin alsa, kásiporyndardyń júktelim shegin 20 paıyzǵa ulǵaıtýǵa bolady», - dedi Erǵalı Sydymanov ortalyq kommýnıkatsııalar qyzmetinde ótken brıfıngide.

Sondaı-aq, sharada pandemııa órship turǵan kezde «Altyn orda» bazarynyń nege jabylmaǵany túsindirildi.

«Altyn orda» bazary boıynsha mynany aıtaıyn. Bul bazar eldegi azyq-túlik baǵasyn qalyptastyrýda úlken ról oınaıdy. Óıtkeni tolaıym saýda jasaýshylardyń kóbi ónimdi osy jerden satyp alady. Eger biz onyń jumysyn shektesek nemese birneshe kúnge jaýyp tastasaq, Almaty oblysy men qalasynan basqa óńirlerde de azyq-túlik baǵasy ósip, dúrbeleń týady. Bul jerde máselege jan-jaqty qaraý kerek», - dedi Almaty oblysy ákiminiń orynbasary Batyrjan Baıjumanov.