Almaty oblysynda áriptesin óltirgen kúdikti ustaldy
TALDYQORǴAN.QazAqparat - Almaty oblysynyń jol-patrýldik polıtsııa qyzmetiniń ókilderi kisi óltirdi degen kúdikpen er adamdy ustady, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, 18-shi qazan kúni tańǵy saǵat 05-00-der shamasynda Almaty-Astana tasjolynyń boıynda jol-patrýldik polıtsııa batalonynyń qyzmetkerleri jol jıeginde turǵan júk kóligin baıqaǵan. Atalǵan kólikti tekserý barysynda alkogoldik ishimdikke mas jáne qobaljyp turǵan 30 jastaǵy er adam polıtseılerdiń kúdigin týdyrǵan. Mán-jaıdy surastyrý barysynda er adamnyń óziniń seriktesin uryp óltirgeni belgili boldy. Tártip saqshylary sol arada er adamdy ustap, qylmys bolǵan jerge qaraı bettegen. Tóńirekti tekserý barysynda birneshe shaqyrym jerden polıtsııa qyzmetkerleri 40-jastaǵy er adamnyń máıitin tapty.
«Kúdikti jáne qaıtys bolǵan er adam ártúrli júkterdi tasymaldaýmen aınalysqan. Kezekti júkterdi tasymaldaý barysynda Qansheńgel aýylyna jaqyn jerde aralarynda janjal týyndap, sonyń saldarynan ustalǵan azamat birneshe pyshaq jaraqatyn salǵan. Seriktesi qashýǵa talpyndy, alaıda ol ony qýyp jetip, qolyna túsken zatpen denesiniń birneshe jerinen urǵan», - dep habarlady Almaty oblysy ІІD Baspasóz qyzmeti.
Qazirgi ýaqytta atalǵan derek boıynsha QR QK 99 babyna sáıkes, sotqa deıingi tergeý amaldary júrgizilip jatyr. Tıisti saraptamalar taǵaıyndaldy. Ustalǵan azamat Jambyl AІІB Ýaqytsha ustaý ızolıatoryna qamaýǵa alyndy.
